“Mutlaqo safsata”. Kreml Putinning kasalligi to‘g‘risida tarqalgan mish-mishlar haqida

Rossiya prezidentining matbuot kotibi Dmitriy Peskov g‘arb nashrlarining Vladimir Putin kasalligi sabab muddatidan oldin iste’foga chiqmoqchiligi to‘g‘risida tarqatgan xabarlarini “mutlaqo safsata” deb atadi. Bu haqda Meduza xabar berdi.

“Sizga aytsam, bu yerda izoh beradigan narsaning o‘zi yo‘q. Bu mutlaqo safsata. Prezidentda hammasi joyida. Sog‘lig‘i a’lo”, — deydi Peskov. Shu bilan birga, u Putin iste’fo chiqish niyatida emasligini ham ma’lum qildi.

5-noyabr kuni The Sun nashri Vladimir Putin 2021-yilning boshida Rossiya prezidentligidan ketmoqchiligi haqida yozgan. Qayd etilishicha, unda sog‘lig‘i bilan bog‘liq muammo mavjud — prezidentda Parkinson kasalligi belgilari aniqlangan. Nashr maqolani politolog Valeriy Soloveyning so‘zlariga tayanib yozgan. Ushbu materialni qolgan g‘arb nashrlari, xususan, Daily Mail va New York Post ham chop etgan.

Avvalroq Putin prezidentlikdan ketganidan so‘ng umrbod senator bo‘lib qolmoqchiligi to‘g‘risida xabar berilgandi.