Suriyada sodir bo‘lgan avariya oqibatida butun mamlakat elektr energiyasisiz qoldi. Bu haqda Suriya Energetika vazirligiga tayanib, “Kommersant” xabar berdi. Hozirda elektr energiyasi ta’minoti bosqichma-bosqich qayta tiklanmoqda.
Xabarda avariya nima sababdan yuzaga kelgani to‘g‘risida ma’lumot berilmagan.
“Tarmoqdagi avariya sabab butun Suriyada elektr energiyasi o‘chib qoldi. Elektr energiyasi ta’minotini qayta tiklash bo‘yicha ishlar olib borilmoqda”, — deyiladi xabarda.
Eslatib o‘tamiz, avgust oyida ham butun Suriya hududida elektr energiyasi o‘chib qolgandi. O‘shanda bunga Damashqdagi gaz quvurida sodir bo‘lgan portlash sabab bo‘lgan. Hukumat buni terakt deb atagandi.