Donald Tramp yanvar oyida prezidentlikdan ketsa, Twitter ijtimoiy tarmog‘i uni maxsus imtiyozlardan mahrum qiladi. Bu haqda ijtimoiy tarmoq vakiliga tayanib, Bloomberg xabar berdi.
Bu shuni anglatadiki, Trampning ijtimoiy tarmoq qoidalarini buzuvchi tvitlari uni vaqtincha yoki butunlay bloklash uchun asos bo‘la oladi. Hozirda ijtimoiy tarmoq bu kabi tvitlarni ajratib yoki yashirib qo‘ymoqda, ammo prezidentning jamoatchilikdagi obro‘sidan kelib chiqib, o‘chirib tashlamayapti.
Ijtimoiy tarmoq vakilining so‘zlariga ko‘ra, Twitter bu — odamlar ochiq va omma oldida yetakchilarga bemalol javob beradigan hamda ularni mas’uliyat ostida ushlab turadigan joy. “Shuni inobatga olgan holda ayrim tivitlar qoidani buzgan bo‘lsa-da, ularda jamoatchilik manfaati yotadi”, — deydi u. Shuningdek, vakil bu kabi qoida boshqa oddiy foydalanuvchilar kabi AQShning sobiq prezidentlariga ham taalluqli ekanligini qayd etgan.
AQShda prezidentlik saylovlari 3-noyabr kuni bo‘lib o‘tdi, ovozlarni sanash jarayoni esa hamon davom etmoqda. Shundan buyon Twitter Donald Trampning saylovga oid sakkizta tvitini ovoz berishda chalg‘ituvchi ahamiyatga ega deb ajratib qo‘ygan.
Avvalroq AQShning amaldagi prezidenti Donald Tramp sotsiologlar va gazetalarni xato baholash hamda saylovchilarga bosim o‘tkazishda ayblagan edi. Bayden esa amerikaliklarni saylov natijalarini kutishda xotirjam bo‘lishga chaqirgan.
Eslatib o‘tamiz, may oyida Tramp Twitter’ni saylov jarayonlariga aralashganlikda ayblagandi. Shundan so‘ng u ijtimoiy tarmoqlarni yopib yuborish bilan tahdid qilgan edi.
Izoh (0)