Sirdaryoda qalbaki 20 ming AQSh dollarini sotmoqchi bo‘lgan shaxslar qo‘lga olindi

Sirdaryo viloyatida qalbaki 20 ming AQSh dollari musodara qilindi, deya xabar bermoqda Davlat xavfsizlik xizmati “Daryo”ga.

DXX Sirdaryo viloyati boshqarmasi hamda Bosh prokuratura huzuridagi Departamentning viloyat boshqarmasi xodimlari hamkorligida o‘tkazilgan tezkor tadbir davomida Toshkent viloyatining Bekobod shahridan Sirdaryo viloyati tomon harakatlanib kelayotgan Nexia rusumli avtomashina Shirin shahriga kirishdagi YPX maskanida to‘xtatilib, tekshirilgan.

Unda avtomashinada yo‘lovchi sifatida ketayotgan fuqaro Q.X. va T.Sh.ga tegishli bo‘lgan qalbaki 20 ming AQSh dollari mazkur avtomashina salonining tom qismiga yashirib qo‘yilganligi aniqlangan.

Dastlabki surishtiruv harakatlari davomida aniqlanishicha, ushbu fuqarolar oldindan o‘zaro til biriktirib, Qirg‘izistonda yashovchi tanishlari orqali 8 ming AQSh dollariga sotib olgan qalbaki 200 dona 100 AQSh dollari kupyurasini Tojikistondagi tanishlariga 10 ming AQSh dollariga sotishni rejalashtirishgan.

https://www.youtube.com/watch?v=cHWz_PWd3dQ

Holat yuzasidan Jinoyat kodeksining tegishli moddasi bilan jinoyat ishi qo‘zg‘atilib, dastlabki tergov harakatlari olib borilmoqda.

Avvalroq Surxondaryoda qalbaki 10 ming dollarni 104 million so‘mga sotgan shaxs, Andijonda 100 ming so‘mlik kupyurani qalbakilashtirgan shaxslar hamda Buxoroda salkam 100 ming dollarlik qalbaki valyutani sotishga uringanlar qo‘lga olingani haqida xabar berilgandi.