Buxoro viloyatida 98 500 dollar qalbaki valyutani arzon narxda so‘mga almashtirishga uringanlar qo‘lga olindi. Holat DXX viloyat boshqarmasi hamda iqtisodiy jinoyatlarga qarshi kurashish departamentining viloyat boshqarmasi xodimlari hamkorligida fosh etilgan, deya xabar berdi “Daryo” muxbiri.

Ta’kidlanishicha, 2020-yilning 8-sentabr kuni Toshkent shahrida yashovchi fuqarolar — Qodir, Sobir va Bobur (ismlar o‘zgartirilgan) Buxoro shahrida yashovchi tanishi Asqarning xonadoniga borib, unga qalbaki dollarni arzon narxda so‘mga almashtirishga uringan. Ular 88 450 dollarni 908 million 735 ming 300 so‘mga almashtirmoqchi bo‘lgan. Asqar esa bundan shubhalangan va huquq-tartibot idoralariga murojaat qilgan.

Voqea joyiga yetib borgan huquq-tartibot idoralari xodimlari 98 500 qiymatdagi qalbaki dollarni so‘mga almashtirishga uringanlarni qo‘lga olgan.

Holat yuzasidan ularga nisbatan Jinoyat kodeksining 25-moddasi (jinoyatga tayyorgarlik ko‘rish va jinoyat sodir etishga suiqasd qilish) hamda 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) 2 va 3-qismi bilan jinoyat ishi qo‘zg‘atilgan.

Hozirda tergov-surishtiruv jarayonlari ketmoqda.