Zoir Mirzayev XTB mas’ullariga xizmat mashinasi berilmaganini tanqid qilgandi. Bir hafta o‘tib ularga 16 ta yangi avtomobil topshirildi

Qashqadaryo hokimi Zoir Mirzayev viloyatda Xalq ta’limi bo‘limi mudirlariga xizmat avtomobillari ajratilmaganini tanqid qilgandi. Bir hafta o‘tib viloyatdagi mavjud 15 nafar XTB mudiri va boshqarma boshlig‘iga yangi avtomobil topshirildi, deya xabar berdi “Daryo” muxbiri.

Ta’kidlanishicha, viloyat rahbari ishtirokidagi tantanali tadbirda Xalq ta’limi boshqarmasi boshlig‘iga Gentra, qolgan mudirlarga esa Nexia-3 avtomobili topshirilgan.

“Bir hafta ilgari viloyat rahbari biz bilan muloqotda tizimdagi muammolar haqida so‘rab, nega xizmat avtomobili ajratilmagani bilan qiziqqandi. Mana bugun yangi xizmat mashinasi berishdi. Demakki, viloyat hokimi bizga sharoit yaratib berish orqali mas’uliyatimiz ortganini, endilikda hokimlarning ta’lim tizimi bo‘yicha maslahatchisi maqomida ekanligimizni eslatib qo‘ydi. O‘ylaymanki, men va hamkasblarim bu e’tiborga munosib javob qaytaramiz”, — deydi Qamashi tuman xalq ta’limi bo‘limi mudiri Nazira Abrayeva.

Eslatib o‘tamiz, avvalroq viloyatning Chiroqchi tumanidagi 61-maktabning qo‘rqinchli sinfxonalari ijtimoiy tarmoqlarda ko‘plab muhokamalarga sabab bo‘lgach voqealar ortidan tushgan OAV vakillari mazkur sinfxonalarda ikki yil davomida o‘quvchilarga ta’lim berilganini fosh qildi. Shundan so‘ng viloyat hokimi Zoir Mirzayev sinfxonalarga o‘tin kiritib, jamoatchilikni aldagan maktab direktori voqeasiga alohida to‘xtalib o‘tdi.

Chiroqchidagi maktab muhokamasiga bag‘ishlangan sessiyada Zoir Mirzayev XTB mas’ullariga xizmat avtomobillari ajratilmaganini eshitgach Moliya boshqarmasi boshlig‘iga “Xalq ta’limi bo‘limi mudirlari maktabga poyezdga osilib boradimi?” degandi.