Sirdaryo viloyatida quvvati 1500 MVt bo‘lgan yangi issiqlik elektr stansiyasi (IES) qurilishi boshlandi, deb xabar bermoqda Energetika vazirligi matbuot xizmati.
Qayd etilishicha, ayni paytda qurilish maydonchasida obyektni qurish uchun yer maydonini tayyorlash ishlari boshlandi. IES ishlayotganda tabiiy gazning yillik tejamkorligi 2,0 milliard kub metrni, elektr energiyasi ishlab chiqarish esa 10,0 milliard kilovatt soatni tashkil qiladi.
Loyiha doirasida bosh pudratchi — Xitoyning China Gezhouba Group Corporation (CGGC) kompaniyasi aniqlandi, u obyektni “tayyor holda” topshirish asosida quradi. Elektr stansiyasi Sirdaryo viloyatining Boyovut tumani va Shirin shahrida joylashadi.
Loyiha Yaponiyaning MHPS kompaniyasi tomonidan ishlab chiqarilgan bo‘lib, foydali ish koeffitsiyenti 60 foizdan yuqori bo‘lgan eng zamonaviy kombinatsiyalangan sikllardan foydalanishni nazarda tutadi.
Prezidentning 2020-yil 10-avgustda “Sirdaryo viloyatida quvvati 1 500 MVt bo‘lgan yangi issiqlik elektr stansiyasi qurilishini tashkil etish chora-tadbirlari to‘g‘risida”gi qarori qabul qilingan.
Hujjat bilan Sirdaryo viloyatida yangi issiqlik elektr stansiyasini qurish to‘g‘risidagi investitsiya shartnomasi O‘zbekiston investitsiyalar va tashqi savdo vazirligi, The International Company for water and power projects (Saudiya Arabistonning suv va energetika loyihalari bo‘yicha kompaniya) va Acwa Power Sirdarya MChJ (loyiha kompaniyasi) o‘rtasida tasdiqlangan.
Shuningdek, qaror bilan “O‘zbekiston milliy elektr tarmoqlari” AJ va Acwa Power Sirdarya o‘rtasida elektr energiyasini sotib olish to‘g‘risida kelishuv tasdiqlandi. Loyiha kompaniyasi ishlab chiqarilgan elektr energiyasini faqat “O‘zbekiston milliy elektr tarmoqlari” AJga sotilishini kafolatlaydi.
Avvalroq Energetika vazirligi ACWA Power kompaniyasini Navoiy viloyatida davlat-xususiy sherikchilik asosida quvvati 500 MVt bo‘lgan shamol elektr stansiyasi qurilishiga jalb etish rejalashtirayotganini ma’lum qilgan edi. Elektr stansiyasini 2022-yilda foydalanishga topshirish belgilangan. Hozirda uning qurilishi uchun maqbul maydonchani aniqlash ishlari olib borilmoqda.
Izoh (0)