Сирдарёда қалбаки 20 минг АҚШ долларини сотмоқчи бўлган шахслар қўлга олинди

Сирдарё вилоятида қалбаки 20 минг АҚШ доллари мусодара қилинди, дея хабар бермоқда Давлат хавфсизлик хизмати «Дарё»га.

ДХХ Сирдарё вилояти бошқармаси ҳамда Бош прокуратура ҳузуридаги Департаментнинг вилоят бошқармаси ходимлари ҳамкорлигида ўтказилган тезкор тадбир давомида Тошкент вилоятининг Бекобод шаҳридан Сирдарё вилояти томон ҳаракатланиб келаётган Nexia русумли автомашина Ширин шаҳрига киришдаги ЙПХ масканида тўхтатилиб, текширилган.

Унда автомашинада йўловчи сифатида кетаётган фуқаро Қ.Х. ва Т.Ш.га тегишли бўлган қалбаки 20 минг АҚШ доллари мазкур автомашина салонининг том қисмига яшириб қўйилганлиги аниқланган.

Дастлабки суриштирув ҳаракатлари давомида аниқланишича, ушбу фуқаролар олдиндан ўзаро тил бириктириб, Қирғизистонда яшовчи танишлари орқали 8 минг АҚШ долларига сотиб олган қалбаки 200 дона 100 АҚШ доллари купюрасини Тожикистондаги танишларига 10 минг АҚШ долларига сотишни режалаштиришган.

https://www.youtube.com/watch?v=cHWz_PWd3dQ

Ҳолат юзасидан Жиноят кодексининг тегишли моддаси билан жиноят иши қўзғатилиб, дастлабки тергов ҳаракатлари олиб борилмоқда.

Аввалроқ Сурхондарёда қалбаки 10 минг долларни 104 миллион сўмга сотган шахс, Андижонда 100 минг сўмлик купюрани қалбакилаштирган шахслар ҳамда Бухорода салкам 100 минг долларлик қалбаки валютани сотишга уринганлар қўлга олингани ҳақида хабар берилганди.