Yangi iPhone 12’ning ishlash samaradorligi o‘zidan oldingi modellardan farq qiladimi? Eng tezkor iPhone va iPad reytingi tuzildi

Taniqli AnTuTu benchmarki jamoasi Apple mobil qurilmalari orasida ishlash bo‘yicha eng samarador smartfonlar reytingini tuzdi, deb xabar beradi IXBT.

2020-yilning oktabrida o‘tkazilgan taqdimotda bir kristalli Apple A14 Bionic protsessoriga ega iPhone 12 va iPhone 12 Pro modellari, shuningdek, iPad Air 4 planshetini taqdim etgandi.

iPhone 12 Pro va iPhone 12 o‘z natijalari bilan 2019-yilda taqdim etilgan SoC Apple A13 Bionic asosidagi iPhone 11 lineykasini, jumladan, iPhone 11 Pro Max flagman modelini ham ortda qoldirgan. Biroq ular iPad Air 4’dan o‘tib keta olmagan. Yangi planshet esa o‘z navbatida ishlash samaradorligi bo‘yicha Apple A12X Bionic hamda Apple 12Z Bionic asosida yaratilgan iPad Pro 3 va 4-avlodlaridan qolib ketgan.

AnTuTu mutaxassislari hozirda 6-noyabrdan buyurtmalar qabul qilish boshlanadigan va 13-noyabrdan sotuvga chiqariladigan iPhone 12 mini va iPhone 12 Pro Max’ning taqdimotini kutmoqda.

Avvalroq iPhone 12 va 12 Pro ishlash samaradorligi bo‘yicha Android flagmanlariga yutqizib qo‘ygani to‘g‘risida xabar berilgandi.