Apple oktabr oyidagi taqdimotida to‘rtta yangi smartfonini namoyish etdi: iPhone 12 Mini, iPhone 12, iPhone 12 Pro va iPhone 12 Pro Max. Barcha gadjetlar kompaniyaning A14 Bionic protsessoriga ega bo‘lgan. Ishlab chiqaruvchining ta’kidlashicha, bu hozirgi kunda bozorda mavjud eng kuchli mobil protsessor hisoblanadi, deb yozadi Hi-Tech.Mail.ru.

Foto: Apple

Internetda AnTuTu benchmarkining iPhone 12 va iPhone 12 Pro’ga oid skrinshotlari paydo bo‘ldi. Natijalar kutilganidek emas.

iPhone 12’ning 4 gigabayt tezkor va 256 gigabayt ichki xotiraga ega modifikatsiyasi testdan o‘tkazilgan. Smartfon jami 564 899 ballni qo‘lga kiritgan. Bunda 157 894 protsessorning ishlash tezligiga, 201 085 ball grafik tezlashtirgichga, 105 677 xotiraga va 90 243 ball UX-testiga berilgan.

6 gigabayt tezkor va 256 gigabayt ichki xotiraga ega iPhone 12 Pro esa jami 572 213 ball to‘plagan. Ularning 167 437 balli protsessorga, 196 812 balli — grafik yadroga, 114 463 — xotiraga va 93 422 — UX-testga berilgan. iPhone 12 kabi Pro versiya ham iOS 14.1 operatsion tizimida ishlaydi.

Skrinshot: Weibo

Skrinshotlarga ko‘ra, tasvirlar dastlab Xitoyning Weibo ijtimoiy tarmog‘ida paydo bo‘lgan. Ularning haqiqiyligini isbotlashning imkoni yo‘q. AnTuTu ma’lumotlar haqiqatga mos kelsa-da, benchmark deyarli hech qachon smartfonlarning real ishlashini ifodalamaydi. AnTuTu’ning rasmiy saytida yangi qurilma haqida hozircha hech narsa yo‘q.

E’tiborli jihati, iPhone 12’ning ikkala versiyasi ham Snapdragon 865 protsessoridan ishlaydigan smartfonlardan pastroq ko‘rsatkichni namoyon etgan. MySmartPrice mualliflari buni tezkor xotira ta’sirining buzilishi bilan izohlamoqda. Bazaviy iPhone 12 4 gigabayt, Pro-versiya — 6 Gb tezkor xotiraga ega. Android’da ishlaydigan aksariyat flagman smartfonlar hozirda 8/12 gigabayt tezkor xotiraga ega bo‘lmoqda, masalan, Samsung Galaxy S20 va Galaxy S20 Ultra.