AQSh Milliy xavfsizlik agentligi sobiq xodimi Edvard Snouden Rossiya fuqaroligini olish uchun ariza berdi. Bu haqda Meduza xabar bermoqda.
“Ota-onalarimizdan bir necha yillik ayriliqdan so‘ng men va rafiqam o‘g‘limizdan ajralishni aslo xohlamaymiz. Shu sababli pandemiya va yopiq chegaralar davrida biz AQSh va Rossiya ikki fuqaroligini olish uchun murojaat qilamiz”, — deb yozgan u Twitter’dagi sahifasida.
Shu bilan birga, Snouden rafiqasi Lindsi Mills bilan amerikalik bo‘lib qolishini va o‘g‘lini “Amerikaning biz sevadigan barcha qadriyatlari, shu jumladan, o‘z fikrini erkin bildirish ruhida” tarbiyalashini ta’kidlagan. “Butun oilam birlashishi uchun AQShga qaytadigan kunni intizorlik bilan kutaman. Bizning asosiy istagimiz — o‘g‘limiz qayerda yashamasin, o‘zini uyidagidek his qilsin”, — deb yozgan Snouden.
Mavzuga doir: Edvard Snouden qachonlardir AQShga qaytish borasidagi umidini yo‘qotmasligini ma’lum qildi
2013-yilda Edvard Snouden AQSh markaziy razvedka boshqarmasi va Milliy xavfsizlik agentligi tomonidan amerikalik fuqarolarni kuzatib borish dasturi haqida hujjatlarni jurnalistlarga topshirgan, shundan so‘ng AQShdan dastlab Gonkongga, keyin Rossiyaga qochib kelgan. AQShda Snoudenni maxfiy ma’lumotlarni oshkor qilganlik uchun 30 yillik qamoq jazosi kutmoqda.
Rossiyada ikki fuqarolikka ruxsat berilgan. Rossiya fuqaroligini olgan chet elliklarga boshqa mamlakatlar fuqaroligidan voz kechish shart emas.
Izoh (0)