AQSh prezidentligiga Demokratlar partiyasidan nomzod Jo Bayden Pensilvaniya, Florida, Arizona va Viskonsinda amaldagi davlat rahbari Donald Trampni ortda qoldirmoqda, deb yozadi “RBK”. The New York Times gazetasi ushbu shtatlarni saylov natijalari uchun eng katta ahamiyatga ega shtatlardan to‘rttasi deb atamoqda.
AQSh shtatlarining katta qismi an’anaviy tarzda Demokratlar yoki Respublikachilar partiyasi uchun ovoz beradi. Shu sababli kampaniya uchun, taxminan, o‘nta shtat hal qiluvchi ahamiyatga ega, ularda nomzodlar imkoniyatlari deyarli teng bo‘ladi. The Cook Political Report hisob-kitoblariga ko‘ra, 2020-yilda bunday shtatlar Texas, Florida, Jorjiya, Shimoliy Karolina, Ogayo va Ayova hisoblanadi. Yana bir nechta shtat — Pensilvaniya, Arizona, Nevada, Viskonsin, Minnesota, Michigan va Nyu-Hempshirdagi vaziyat ham noaniq, ammo bu shtatlar Demokratlar partiyasiga moyillik ko‘rsatmoqda.
NYT va Siena College o‘tkazgan so‘rov natijalariga ko‘ra, Bayden Floridada 3 ta punktga, Pensilvaniya va Arizonada 6 punktga, Viskonsinda 11 punktga yetakchilik qilmoqda. Gazeta qayd etishicha, so‘rov natijalari Bayden 2016-yilda ovoz bermagan saylovchilar orasida ommaboproq bo‘lgan. Ular Demokratlardan nomzodni Viskonsinda 19 ta punktga, Floridada 17 punktga, Pensilvaniyada 12 punktga va Arizonada 7 punktga ustunlik bilan qo‘llab-quvvatlamoqda.
Shuningdek, so‘rov nomzodlar orasidagi gender farqni ham aniqladi. Masalan, Arizonada so‘rovning erkak ishtirokchilari orasida Tramp Baydendan o‘zib ketgan bo‘lsa, Bayden, aksincha ayollar orasida yetakchilik qilgan. Bundan tashqari, Bayden oliy ma’lumotli oq tanli saylovchilar orasida katta farq bilan Trampni ortda qoldirgan bo‘lsa, Pensilvaniya va Viskonsinda keksalar orasida Bayden yana yetakchilik qilmoqda.
AQSh prezidenti saylovi 3-noyabr kuni bo‘lib o‘tadi. Uning o‘ziga xosligi shundan iborat bo‘ladiki, koronavirus pandemiyasi orqali amerikaliklarning rekord darajadagi qismi pochta orqali ovoz beradi.
AQSh prezidenti saylovida g‘olib to‘g‘ridan to‘g‘ri saylovchilar tomonidan emas, balki saylovchilar kollegiyasi tomonidan aniqlanadi. Jami saylovchilar 538 kishi, g‘alaba uchun 270 kishining ovozi kerak. Saylovchilar soni har bitta shtatda aholi soniga mos ravishda taqsimlanadi — eng ko‘p aholi yashaydigan Kaliforniya shtati 55 saylovchiga ega. Ikkinchi eng yirik shtat — Texasda 38 saylovchi, Nyu-York va Floridada — 29 tadan saylovchi bor. Ikki pog‘onali tizimni hisobga olganda, nomzod umummilliy darajada kamroq ovoz to‘plasa ham muayyan shtatlardagi g‘alabasi hisobiga saylovda g‘olib bo‘lishi mumkin.
Izoh (0)