Edvard Snouden qachonlardir AQShga qaytish borasidagi umidini yo‘qotmasligini ma’lum qildi

2013-yilda AQSh maxsus xizmatlarining kuzatuv ko‘lami va usullari haqidagi ma’lumotlarni tarqatib yuborgan Edvard Snouden AQShga qaytish borasidagi umidi yo‘qolmasligini aytdi. Bu haqda u Germaniyaning Spiegel nashriga bergan intervyusida ma’lum qildi, deb xabar berdi “TASS”.

“Qachonlardir AQShga qaytishni umid qilmoqdamisiz?” deya berilgan savolga, “Ha, albatta, biroq buning qanchalik iloji bor ekanligini bilmayman. Umuman olganda, mening nomimga bildirilgan ayblovlar yildan yilga kamroq jaranglamoqda. Bu esa hatto menda ham umid bor ekanligini bildiradi”, deya javob berdi Snouden.

Milliy xavfsizlik agentligining sobiq xodimi AQSh hukumati tomonidan afv etilishidan umidvor emasligini ta’kidlagan. “Barak Obama (sobiq prezident) mening qilgan ishimni shaxsiy haqorat sifatida qabul qildi, chunki barcha javobgarliklar uning bo‘yniga qo‘yildi”, — deya aniqlik kiritdi Edvard.

Shuningdek, Snouden intervyuda Rossiyadagi hayoti haqida ham so‘zlab berdi: “Men juda ko‘p sayohat qilmoqdaman, yaqinda Sankt-Peterburgga bordim. Qarindoshlarim vaqti-vaqti bilan ko‘rgani kelib turishadi... Eng yomoni — meni do‘konlarda tanib qolishlari”.

Shu bilan birga u, nemis kontrrazvedkasi rahbari Xans-Georg Masenning o‘zini Rossiya maxsus xizmatlari bilan aloqasi bor deya qilgan shamasini tanqid qildi. “U hatto meni josus deya atashga jur’at topa olmadi. Buning o‘rniga u mening rus agenti ekanligimni isbotlovchi dalillar keltira olmasligini gapirdi, biroq uning so‘zlariga ko‘ra, ‘ishonchlilik’ning ma’lum pog‘onasi mavjud. Bu kabi gaplarni istalgan odam borasida aytish mumkin”, — dedi Snouden.