АҚШ Миллий хавфсизлик агентлиги собиқ ходими Эдвард Сноуден Россия фуқаролигини олиш учун ариза берди. Бу ҳақда Meduza хабар бермоқда.
«Ота-оналаримиздан бир неча йиллик айрилиқдан сўнг мен ва рафиқам ўғлимиздан ажралишни асло хоҳламаймиз. Шу сабабли пандемия ва ёпиқ чегаралар даврида биз АҚШ ва Россия икки фуқаролигини олиш учун мурожаат қиламиз», — деб ёзган у Twitter’даги саҳифасида.
Шу билан бирга, Сноуден рафиқаси Линдси Миллс билан америкалик бўлиб қолишини ва ўғлини «Американинг биз севадиган барча қадриятлари, шу жумладан, ўз фикрини эркин билдириш руҳида» тарбиялашини таъкидлаган. «Бутун оилам бирлашиши учун АҚШга қайтадиган кунни интизорлик билан кутаман. Бизнинг асосий истагимиз — ўғлимиз қаерда яшамасин, ўзини уйидагидек ҳис қилсин», — деб ёзган Сноуден.
Мавзуга доир: Эдвард Сноуден қачонлардир АҚШга қайтиш борасидаги умидини йўқотмаслигини маълум қилди
2013 йилда Эдвард Сноуден АҚШ марказий разведка бошқармаси ва Миллий хавфсизлик агентлиги томонидан америкалик фуқароларни кузатиб бориш дастури ҳақида ҳужжатларни журналистларга топширган, шундан сўнг АҚШдан дастлаб Гонконгга, кейин Россияга қочиб келган. АҚШда Сноуденни махфий маълумотларни ошкор қилганлик учун 30 йиллик қамоқ жазоси кутмоқда.
Россияда икки фуқароликка рухсат берилган. Россия фуқаролигини олган чет элликларга бошқа мамлакатлар фуқаролигидан воз кечиш шарт эмас.
Изоҳ (0)