Turkiya g‘arbidagi Izmir viloyatida yuz bergan zilzila oqibatida turar joy binolarining vayronalari ostida qolib ketgan 3 yoshli qizaloq 65 soatdan so‘ng qutqarib olindi, deb xabar beradi Anadolu.
Ta’kidlanishicha, qizcha yaqin atrofdagi shifoxonalardan biriga yotqizilgan. Uch yoshli Elif Perinchekning yaqinlari uning qutqarib olinishini mo‘jiza deb atagan. Hozirga qadar mamlakatda qutqaruvchilar tomonidan vayronalar ostidan chiqarib olinganlar soni 106 kishiga yetdi.
Avvalroq Izmirdagi vayronalar ostida qolib kelgan erkak 33 soatdan so‘ng qutqarib olingani ma’lum bo‘lgandi.
Anadolu agentligi tomonidan e’lon qilingan videoda qutqaruvchilar avvaliga vayronalarni tozalayotgani shundan so‘ng, jabrlangan erkakni tez yordam karetasida olib ketayotgani tasvirlangan.
So‘nggi ma’lumotlarga ko‘ra, Turkiya g‘arbida sodir bo‘lgan zilzila qurbonlari soni 83 kishiga yetgan. “RIA Novosti”ning mamlakat Favqulodda vaziyatlar va tabiiy ofatlar agentligiga tayanib yozishicha, jarohatlar olganlar soni hozirda 962 kishini tashkil etmoqda, ularning 219 nafari shifoxonalarda davolanyapti.
Eslatib o‘tamiz, zilzila 30-oktabr kuni tushdan keyin Turkiyaning g‘arbiy qismida sodir bo‘lgan, uning kuchi 6,6 ballni tashkil etgandi. Zilzila epimarkazi Egey dengizida, Izmir viloyatining Seferihisar shahri yaqinida bo‘lgan.
Yer silkinishi kuchi Gretsiya orollarida ham sezilgan. Grek seysmologlari uning kuchini 6,9 ball deb baholadi. Zilzila oqibatida Gretsiyaning Samos orolida ikki kishi halok bo‘ldi, 20 kishi jarohat oldi. Orolda 6 oylik favqulodda holat e’lon qilindi.
Izoh (0)