Italiya, Ispaniya va Polshada koronavirus bilan kasallanish bo‘yicha sutkalik antirekordlar yangilandi

Italiyada o‘tgan bir sutka ichida yana 31 084 kishida koronavirus aniqlandi. Bu mamlakatda pandemiya boshlanganidan buyon hozirga qadar qayd etilgan sutkalik rekord ko‘rsatkich hisoblanadi, deb xabar beradi “Interfaks”.

Mamlakat Sog‘liqni saqlash vazirligi ma’lumotlariga ko‘ra, bir sutka davomida 199 kishi koronavirus asoratlari oqibatida vafot etgan bo‘lib, jami qurbonlar soni 38 321 kishiga yetgan.

Corriere della Sera nashrining yozishicha, shifokorlar infeksiyaning bu kabi tezkorlik bilan tarqalishidan xavotirda, mamlakatda yana karantin joriy etilishi mumkin.

Jons Hopkins universiteti ma’lumotlariga ko‘ra, Italiyada koronavirus bilan kasallanganlarning jami soni 647 ming kishidan oshgan va hozirga qadar ularning 283,5 mingdan ortig‘i davolangan.

Avvalroq USM Holdings kompaniyasining eng yirik aksiyadori Alisher Usmonov koronavirusga qarshi kurashish uchun Italiyaning Sardiniya oroli hokimiyatiga 500 ming yevro o‘tkazgani to‘g‘risida xabar berilgandi.

So‘nggi yetti kun ichida Ispaniyada koronavirus bilan kasallanganlar soni 139 546 kishiga ortgan. O‘tgan bir sutka ichida 239 nafar bemor koronavirus qurboniga aylangan. Mamlakatda pandemiya boshlanganidan buyon COVID-19 oqibatida vafot etganlar soni 35 878 kishini tashkil etmoqda.

Avvalroq Ispaniya parlamenti hukumatning mamlakatda 2021-yilning 9-mayigacha favqulodda holat rejimini joriy qilish haqidagi taklifini ma’qullagan edi. Mamlakatda favqulodda holat tartibi 25-oktabr oqshomidan boshlab kuchga kirgan.

Bundan oldingi rekord ko‘rsatkich 29-oktabr kuni qayd etilgan — 20 156 ta holat.

Mamlakatda pandemiya boshlanganidan buyon COVID-19 bilan kasallanganlar soni 340 834 kishiga yetdi. Shuningdek, o‘tgan bir sutka ichida 202 kishi koronavirus qurboniga aylangan (jami qurbonlar soni 5351 kishiga yetdi).