AQShda COVID-19 koronavirus infeksiyasi bilan kasallanish bo‘yicha sutkalik antirekordlar yangilanishda davom etmoqda – 29-oktabr holatiga ko‘ra bir sutka ichida 90 456 ta yangi holat qayd etildi. Bu haqda NBC News xabar bergan.
Telekanal xabariga ko‘ra, bu 28-oktabrda qayd etilgan ko‘rsatkichdan 10 mingta holatga ko‘p.
Shu tariqa COVID-19 pandemiyasi boshlanganidan buyon AQShda bir kun davomida kasallik qayd etilganlar soni ilk bora 90 ming nafardan oshgan.
Bundan tashqari, bir sutkada 982 nafar bemor infeksiya asoratlari oqibatida hayotdan ko‘z yumgan.
CNN telekanali COVID-19 koronavirusi bo‘yicha Oq uy ishchi guruhining mamlakat g‘arbiy qismida infeksiyaning to‘xtalishsiz, keng miqyosda tarqalib borayotgani va pandemiyaga qarshi kurash bo‘yicha choralarni kuchaytirish lozimligini bildirgani haqida xabar bergan.
“Biz AQSh o‘rta g‘arbi, yuqori o‘rta g‘arbi va g‘arbida koronavirus infeksiyasining to‘xtovsiz keng miqyosda tarqalishini kuzatmoqdamiz. Bu kasallikning belgisiz va belgili shakllariga qarshi tezkor va samarali choralar ko‘rishni talab etadi”, – deyiladi ishchi guruh bayonotida.
Guruh hudud shtatlarini epidemiologik xavfsizlik talablariga rioya etish, ijtimoiy masofalanishga amal qilish, shuningdek, jamoat joylarida olomonning to‘planishiga yo‘l qo‘ymaslik lozimligini qayd etgan.
Worldometer saytining ma’lumoti bo‘yicha 30-oktabr Toshkent vaqti bilan 19:00 holatiga ko‘ra, AQShda 9 million nafardan ko‘proq aholida koronavirus infeksiyasi aniqlangan, 234 mingdan ziyod bemor infeksiya asoratlari oqibatida hayotdan ko‘z yumgan.
Avval AQShda o‘tgan bir hafta ichida koronavirus bilan kasallanish bo‘yicha rekord ko‘rsatkich qayd etilgani haqida xabar berilgandi.
Izoh (0)