Италия, Испания ва Польшада коронавирус билан касалланиш бўйича суткалик антирекордлар янгиланди

Италияда ўтган бир сутка ичида яна 31 084 кишида коронавирус аниқланди. Бу мамлакатда пандемия бошланганидан буён ҳозирга қадар қайд этилган суткалик рекорд кўрсаткич ҳисобланади, деб хабар беради «Интерфакс».

Мамлакат Соғлиқни сақлаш вазирлиги маълумотларига кўра, бир сутка давомида 199 киши коронавирус асоратлари оқибатида вафот этган бўлиб, жами қурбонлар сони 38 321 кишига етган.

Corriere della Sera нашрининг ёзишича, шифокорлар инфекциянинг бу каби тезкорлик билан тарқалишидан хавотирда, мамлакатда яна карантин жорий этилиши мумкин.

Жонс Ҳопкинс университети маълумотларига кўра, Италияда коронавирус билан касалланганларнинг жами сони 647 минг кишидан ошган ва ҳозирга қадар уларнинг 283,5 мингдан ортиғи даволанган.

Аввалроқ USM Holdings компаниясининг энг йирик акциядори Алишер Усмонов коронавирусга қарши курашиш учун Италиянинг Сардиния ороли ҳокимиятига 500 минг евро ўтказгани тўғрисида хабар берилганди.

Сўнгги етти кун ичида Испанияда коронавирус билан касалланганлар сони 139 546 кишига ортган. Ўтган бир сутка ичида 239 нафар бемор коронавирус қурбонига айланган. Мамлакатда пандемия бошланганидан буён COVID-19 оқибатида вафот этганлар сони 35 878 кишини ташкил этмоқда.

Аввалроқ Испания парламенти ҳукуматнинг мамлакатда 2021 йилнинг 9 майигача фавқулодда ҳолат режимини жорий қилиш ҳақидаги таклифини маъқуллаган эди. Мамлакатда фавқулодда ҳолат тартиби 25 октябрь оқшомидан бошлаб кучга кирган.

Бундан олдинги рекорд кўрсаткич 29 октябрь куни қайд этилган — 20 156 та ҳолат.

Мамлакатда пандемия бошланганидан буён COVID-19 билан касалланганлар сони 340 834 кишига етди. Шунингдек, ўтган бир сутка ичида 202 киши коронавирус қурбонига айланган (жами қурбонлар сони 5351 кишига етди).