Qorabog‘ hududidagi mojaroda Ozarbayjon Qurolli kuchlari tarkibida turib jang qilgan suriyalik Mehred Muhammad Alshxer tan olinmagan Tog‘li Qorabog‘ respublikasi Mudofaa armiyasi harbiy xizmatchilari tomonidan asirga olindi, deb xabar beradi “Interfaks”.
“Asirga olingan shaxs asli Xama shahri fuqarosi hisoblanadi”, — deyiladi tan olinmagan respublika Mudofaa vazirligi matbuot xizmatining xabarida.
So‘roq paytida suriyalik asir 19-oktabr kuni 250 nafar yollanma jangchi bilan Qorabog‘dagi mojaro zonasiga kelganliklarini bildirgan.
“Bizga 2 ming dollar va’da qilishdi, ammo hali qo‘limizga olmadik. Bizni bu yerda turklar olib keldi. Jarohat olganimdan so‘ng meni tashlab ketishdi. Old qatorda biz boramiz, undan keyin ikkinchi liniya va ulardan so‘ng ozarbayjonlik harbiylar. Qorabog‘ga kelgunimga qadar yig‘inlarda qatnashganman, biz bilan turk instruktorlari ishlagan”, — deya suriyalikning so‘zlarini keltiradi matbuot xizmati.
Shuningdek, ma’lumotlariga ko‘ra, Turkiya qurolli kuchlari tomonidan qo‘llab-quvvatlangan Suriyadagi muxolifat guruhlaridan birining yetakchisi Husayn Abo 28-oktabr kuni Tog‘li Qorabog‘ mojarosi zonasida halok bo‘lgan.
Ta’kidlanishicha, Qorabog‘dagi mojaro zonasiga Turkiya tomoni bilan birgalikda suriyalik yollanma jangchilarni jalb etish bilan shug‘ullangan Abo arman aviatsiyasi tomonidan amalga oshirilgan zarbalar oqibatida halok bo‘lgan.
Eslatib o‘tamiz, Tog‘li Qorabog‘dagi harbiy harakatlar tinchlikka erishish uchun qilingan ikkita urinishga qaramasdan, 27-sentabrdan buyon davom etmoqda. Ozarbayjon va Armaniston 10-oktabr kuni soat 12:00 dan boshlab Tog‘li Qorabog‘da o‘t ochishni to‘xtatish to‘g‘risida kelishib olgandi. Ammo shu kuni keyinroq Armaniston va Ozarbayjon Mudofaa vazirliklari bir-birini Tog‘li Qorabog‘da o‘t ochishni to‘xtatish rejimini buzishda aybladi.19-oktabrda Armaniston bosh vaziri Nikol Pashinyan va Ozarbayjon prezidenti Ilhom Aliyev Tog‘li Qorabog‘dagi mojaro bo‘yicha muzokaralar o‘tkazishga tayyorligini ma’lum qilgan. Keyinroq Pashinyan Tog‘li Qorabog‘da Rossiya uchun bevosita xavf soluvchi Suriya terrorchilik guruhlari jangarilari bo‘lganligi uchun Moskva u yerda aksilterrorchilik operatsiyalarini o‘tkazish uchun asosga ega ekanligini aytgan.
Izoh (0)