Fransiya poytaxti Parij shahrida qurollangan erkak politsiyachilarga hujum qilishga urindi. Bu haqda Meduza xabar berdi.
Xabar berilishicha, Parijning 15-mavzesida yashaydigan ayol 30-oktabr kuni kunduzi politsiyaga hovlida ikki nafar shubhali erkakni ko‘rgani haqida xabar bergan.
Politsiyachilar ko‘rsatilgan manzilga yetib kelganida ikkita oshxona pichog‘i bilan qurollangan erkak “Allohu akbar” deb baqirib, ularga hujum qilishga uringan. Politsiyachilar elektroshoker, to‘pponcha va tayoq qo‘llashga majbur bo‘lgan.
Hujum qilgan erkak, taxminan, 40 yoshda bo‘lib, u qo‘lga olingan. Erkak bilan birga uning 60 yoshli otasi ham qo‘lga olingan.
Ma’lum bo‘lishicha, hujum qilgan erkak allaqachon politsiya kuzatuvida bo‘lgan. Ba’zi ma’lumotlarga ko‘ra, unda shizofreniya kasalligi mavjud.
Eslatib o‘tamiz, 29-oktabr kuni Fransiyaning Nitssa shahridagi Notr-Dam ibodatxonasida qurollangan erkak odamlarga hujum qilib, uch kishini o‘ldirdi. Jinoyatchi 21 yoshli tunislik bo‘lib chiqdi. Fransiya hukumati Nitssadagi hujumni terakt deb baholadi, mamlakatda terroristik xavfning eng yuqori darajasi e’lon qilindi.
29-oktabrning o‘zida Fransiyaning Avinyon shahrida pichoq bilan qurollangan erkak “Allohu akbar” deb qichqirib, politsiyachilarga hujum qilishga uringan. Politsiyachilar o‘t ochgan va hujum qilgan erkakni o‘ldirgan. Deyarli bir vaqtda Saudiya Arabistonining Jidda shahrida Fransiya konsulligiga hujum uyushtirilgan, konsullik qo‘riqchisi jarohat olgan. Hujum qilgan erkak qo‘lga olingan. Bundan tashqari, Fransiyada Lion shahrida ham sodir bo‘lishi mumkin bo‘lgan yana bir tajovuzkor harakatning oldi olingan.
Izoh (0)