Google’ning alohida hududlarda internet ishlashini ta’minlash bilan shug‘ullanadigan Loon LLC nomli sho‘ba kompaniyasiga tegishli havo shari stratosferada parvoz qilish davomiyligi bo‘yicha yangi rekordni o‘rnatdi. Bu haqda Loon sayti orqali ma’lum qilindi.
“Kompaniya qurilmasi havoda 312 kun turdi. Bu oldingidan 89 kunga ko‘p demak. Shar dastlab Puerto-Rikoda uchirilgan, shundan so‘ng u Peruga yo‘l olib, u yerda uch oy tarmoqqa kirish nuqtasi sifatida xizmat qilgan. Keyin esa Janubiy Atlantika, Hind okeani orqali uchib, Meksikaga yetib borgan. 10 oy davomida shar jami 135 ming mil yo‘l bosgan”, — deyiladi xabarda.
Loon texnik direktori Salvatore Kandidoning ma’lum qilishicha, shar maxsus dizayn va materiallar hisobiga stratosferada bu qadar uzoq qolgan.
Muhandislar sutka davomida muntazam sharning telemetriyasini kuzatib, kelajakda qurilma konstruksiyasiga kiritiladigan o‘zgartirishlarni aniqlab borgan. Navigatsion tizim parvoz uchun optimal balandlikni aniqlaydi, shu orqali shar o‘ziga kerak bo‘lgan harorat darajasini saqlab qolgan.
Eslatib o‘tamiz, Google Puerto-Rikoda internetga ulanish imkonini beruvchi sharlarni ilk bor 2017-yilda havoga uchirgan edi. Ta’kidlanishicha, sharlar yordamida Wi-Fi’ga ulanish mumkin.
Izoh (0)