Google’нинг алоҳида ҳудудларда интернет ишлашини таъминлаш билан шуғулланадиган Loon LLC номли шўъба компаниясига тегишли ҳаво шари стратосферада парвоз қилиш давомийлиги бўйича янги рекордни ўрнатди. Бу ҳақда Loon сайти орқали маълум қилинди.
«Компания қурилмаси ҳавода 312 кун турди. Бу олдингидан 89 кунга кўп демак. Шар дастлаб Пуэрто-Рикода учирилган, шундан сўнг у Перуга йўл олиб, у ерда уч ой тармоққа кириш нуқтаси сифатида хизмат қилган. Кейин эса Жанубий Атлантика, Ҳинд океани орқали учиб, Мексикага етиб борган. 10 ой давомида шар жами 135 минг мил йўл босган», — дейилади хабарда.
Лоон техник директори Салваторе Кандидонинг маълум қилишича, шар махсус дизайн ва материаллар ҳисобига стратосферада бу қадар узоқ қолган.
Муҳандислар сутка давомида мунтазам шарнинг телеметриясини кузатиб, келажакда қурилма конструкциясига киритиладиган ўзгартиришларни аниқлаб борган. Навигацион тизим парвоз учун оптимал баландликни аниқлайди, шу орқали шар ўзига керак бўлган ҳарорат даражасини сақлаб қолган.
Эслатиб ўтамиз, Google Пуэрто-Рикода интернетга уланиш имконини берувчи шарларни илк бор 2017 йилда ҳавога учирган эди. Таъкидланишича, шарлар ёрдамида Wi-Fi’га уланиш мумкин.
Изоҳ (0)