29-oktabr kuni savdolar natijalariga ko‘ra, Alphabet (Google’ning bosh kompaniyasi), Facebook va Twitter texnologik kompaniyalar aksiyalari 5 foizdan ham ko‘proq (har biriniki) tushib ketdi, deb yozadi “RBK”. Pasayish AQSh Senatining savdo qo‘mitasi eshituvlari fonida boshlandi.
Savdolar yopilishiga kelib, uchta kompaniya birgalikda bozor qiymatida qariyb 107 milliard dollar yo‘qotdi:
Facebook aksiyalari 5,51 foizga arzonlashdi, kompaniya kapitalizatsiyasi 44,5 milliard dollarga pasaydi;
Twitter aksiyalari narxi 5,34 dollarga pasaydi, kompaniyaning bozor qiymati esa — 2,17 milliard dollarga;
Alphabet kotirovkalari 5,51 foizga tushib ketdi, butun kompaniya 60 milliard dollarga arzonlashdi.
Asosiy savdolar yopilgach, kompaniya aksiyalari yana o‘sishni boshladi. Twitter kotirovkalari esa postmarketda 5,5 foizga qimmatlashib, o‘tgan kun talafotini to‘liq qoplab oldi.
Qonun chiqaruvchilar Alphabet, Facebook va Twitter rahbarlarini internet haqidagi asosiy qonunni isloh qilishni masofadan muhokama qilishga taklif etgandi. Majlisning e’lon qilingan mavzusi: “230-moddaning gap-so‘zsiz himoyasi bigtexlar (texnologik gigantlar) suiiste’molini keltirib chiqaradimi?”
Bunda gap “Kommunikatsiyalar sohasidagi axloq to‘g‘risida”gi AQSh qonunining 230-moddasi haqida bormoqda. Modda aslida ijtimoiy tarmoqlar va IT-kompaniyalarni foydalanuvchilar tomonidan joylashtirilayotgan kontent uchun javobgarlikdan ozod qiladi. U, shuningdek, kompaniyalarga o‘zlari beadab, haqoratli yoki qandaydir sababga ko‘ra nomaqbul deb hisoblagan kontentni ko‘rishni cheklab qo‘yish imkoniyatini beradi.
Yanqinda Facebook va Twitter New York Post’ning AQSh sobiq vitse-prezidenti va demokratik partiyadan prezidentlikka nomzod Jo Baydenning oilasi haqidagi maqolasini ko‘rishni cheklab qo‘yganidan keyin ushbu qonun faol muhokama qilina boshladi.
Eshituvlar chog‘ida respublikachilar internet-platformalarning xolis emasligini qayd etdi. Demokratlar, aksincha, kontentning ko‘proq nazorat qilinishi zarurligini ta’kidladi, ayniqsa, saylovlar va jamoatchilik sog‘lig‘ini saqlash haqidagi dezinformatsiyaga nisbatan, shuningdek, kompaniyalarni zarar keltiruvchi kontentni samarali o‘chirishga qodir emaslikda aybladi.
O‘zining javob nutqida Twitter rahbari Jek Dorsi 230-moddani “so‘z erkinligi va xavfsizlik haqidagi eng muhim internet qonuni” deb atadi. Uning fikricha, qonun nizomlarining bekor qilinishi kontent ustidan nazoratning susayishiga emas, balki kuchayishiga olib keladi. Undan tashqari, bu odamlarning internetda muloqot qilish jarayoniga putur yetkazishi mumkin.
Taklif etilgan kompaniyalar rahbarlarining so‘zlariga ko‘ra, 230-modda ular uchun so‘z erkinligini saqlash va nazorat o‘rtasida muvozanat saqlashda vosita bo‘lmoqda.
Eshituvlarda Rossiyaning 2020-yil saylovlariga ehtimoliy aralashuvi masalasiga ham to‘xtaldi. Bu masala yuzasidan Twitter va Facebook rahbarlari Jek Dorsi va Mark Sukerberg ularda aralashish ehtimoli haqida axborot yo‘qligini ma’lum qildi.
Senatdagi eshituvlar hozircha hech qanday qarorlarsiz yakunlandi. 3-noyabrdagi saylovlar natijalariga qarab qonunga bog‘liq vaziyat keskin o‘zgarishi mumkin, deb yozadi The Bell nashri.
Izoh (0)