Samarqand shahridagi koronavirus bilan kasallanishda gumon qilingan hamda tasdiqlangan bemorlarni taqsimlash markazi bosh shifokori Abdulla Abiyev viloyatda virus tarqalishining cho‘qqisi ortda qolganini ma’lum qildi, deb xabar beradi “Zarnews”.
Abdulla Abiyev qayd etishicha, bugungi kunda davolash va taqsimlash markazida COVID-19 kasalligiga chalingan va shu kasallikka gumon qilingan 600 nafardan ortiq bemor davolanmoqda. Ayni paytda markazga Samarqand shahri, Pastdarg‘om, Samarqand, Jomboy, Payariq va Oqdaryo tumanlaridan boshqa hududlarga nisbatdan ko‘proq bemor kelmoqda.
Markaz bosh shifokori keyingi 4-5 kunda bemorlar soni kamayayotgani, jumladan, og‘ir bemorlar soni ham oldingiga nisbatan ancha kamligini ta’kidlagan.
“Bemorlar kelishi va umumiy statistikaga asoslanib aytish mumkinki, Samarqand virus tarqalishining cho‘qqisidan o‘tdi. Ammo dunyo tajribasidan ko‘rinib turibdiki, xastalik vaqti-vaqti bilan avj olishi holatlari ham kuzatilmoqda. Shuning uchun virus kelib chiqishi bilan bog‘liq sanitariya qoidalariga e’tiborsiz bo‘lishga haqqimiz yo‘q”, — deydi taqsimlash markazi bosh shifokori.
Avvalroq Sog‘liqni saqlash vazirligi huzuridagi Koronavirusga qarshi kurash shtabi a’zosi Nargiza Nurullayeva O‘zbekistonda COVID-19 bilan qayta kasallanish holatlari qayd etilayotganini ma’lum qilgandi.
Mavzuga doir:
Izoh (0)