Toshkent davlat yuridik universiteti va Tojikiston davlat huquq, biznes va siyosat universiteti o‘rtasida qo‘shma fakultetni tashkil etish bo‘yicha shartnoma imzolandi. Bu haqda TDYU axborot xizmati xabar berdi.
Shartnomani imzolashda ikki oliy ta’lim muassasasi rahbariyati, mas’ul xodimlari va professor-o‘qituvchilar ishtirok etgan.
“Zoom platformasi orqali bo‘lib o‘tgan tadbirda O‘zbekiston oliy ta’lim tizimini Markaziy Osiyoda xalqaro ta’lim dasturlarini amalga oshiruvchi “xab”ga aylantirish, mamlakatimizga xorijiy talabalar va investitsiyalarni jalb etish, TDYUning xalqaro reytinglarga kirishini ta’minlash maqsadida tashkil etilgan mazkur fakultet universitetning xorijdagi ilk fakulteti ekani qayd etildi.
Qo‘shma fakultetda nafaqat Tojikiston Respublikasi, balki boshqa xorijiy mamlakatlarning fuqarolari ham o‘qishi mumkin. O‘qish xalqaro standartlarga muvofiq, ingliz va rus tillarida olib boriladi”, – deyiladi xabarda.
Fakultetda kadrlar tayyorlash bakalavriat bosqichida “3+1” va magistratura mutaxassisliklarida “1+1” ikki tomonlama diplom dasturi doirasida amalga oshiriladi hamda bitiruvchi talabalar Toshkent davlat yuridik universiteti va Tojikiston davlat huquq, biznes va siyosat universiteti diplomlarini qo‘lga kiritadi.
Tojikiston davlat huquq, biznes va siyosat universiteti Xo‘jand shahrida joylashgan, 6 ta fakultet, 3 ta o‘quv korpusi va 11 ta o‘quv laboratoriyaga ega. Universitetda 388 nafar professor-o‘qituvchi, jumladan, 148 nafar fan nomzodi va doktori faoliyat yuritadi.
2020-yil may oyida Toshkent davlat yuridik universitetida Xalqaro huquq va qiyosiy huquqshunoslik fakulteti tashkil etilishi haqida xabar berilgan. Sentabrda Toshkent davlat yuridik universiteti tomonidan G‘afur G‘ulom nomidagi maxsus stipendiya hamda ko‘krak nishoni ta‘sis etilgandi.
Izoh (0)