O‘zbekiston elchixonasi ko‘magi bilan Toshkent viloyati hokimi Rustam Xolmatov va Singapurning Universal Success Enterprises Limited kompaniyasi raisi Prasun Mukerji poytaxt viloyatida Nurafshon City qurilish loyihasini amalga oshirish bo‘yicha hamkorlik to‘g‘risida bosh kelishuvni onlayn tarzda imzoladi, deb xabar bermoqda “Dunyo” AA.
Hujjat Singapur kompaniyasi tomonidan o‘zbekistonlik hamkorlar bilan birgalikda 2021-yil birinchi choragining oxiriga qadar loyihaning texnik-iqtisodiy asosini ishlab chiqish, keyinchalik tasdiqlash va zamonaviy Nurafshon shahri qurilishining boshlanishini nazarda tutadi. Loyihaning umumiy maydoni, taxminan, 2 ming 833 gektarni tashkil etadi va u uch bosqichda amalga oshiriladi.
Loyihani Universal Success Enterprises Limited yoki ushbu kompaniya tomonidan tashkil etilgan xorijiy kompaniyalar konsorsiumi tomonidan jalb qilingan to‘g‘ridan to‘g‘ri xorijiy investitsiyalar yoki xorijiy moliya institutlarining kredit liniyalari asosida amalga oshirish ko‘zda tutilgan. Investitsiyalarning umumiy hajmi loyihaning texnik-iqtisodiy asoslarini tayyorlash natijalariga ko‘ra aniqlanadi.
Eslatib o‘tamiz, avval Toshkent viloyati o‘zining ma’muriy markaziga ega emasdi. 2017-yil 24-avgust kuni Senat To‘ytepa shahrini Toshkent viloyatining ma’muriy markazi etib belgiladi. 2017-yil 25-avgust kuni Toshkent viloyati To‘ytepa shahri nomi Nurafshon shahri, deb o‘zgartirildi. 2018-yil 26-mart kuni “Aqlli shahar” konsepsiyasi bo‘yicha Toshkent viloyati ma’muriy markazi qurilishini tashkil etish chora-tadbirlari to‘g‘risida hukumat qarori e’lon qilindi.
Shahar O‘zbekistondagi birinchi “aqlli” shahar bo‘ladi, unda ma’muriy binolar, zamonaviy va qulay turar joylar, biznes markazlar, mehmonxonalar, sport majmualari, yoshlar ijodiyot markazi, kutubxona, maktablar, ko‘p tarmoqli shifoxona bunyod etiladi.
Izoh (0)