“Angren shakar” va “Xorazm shakar” mas’uliyati cheklangan jamiyatlari shu kunlarda ommaviy ravishda xodimlarini ishdan bo‘shatishni boshlagani haqida xabar berilgandi. Toshkent viloyati hokimligi matbuot xizmati “Angren shakar” zavodidagi vaziyat bo‘yicha ma’lumot berdi.
Ma’lum qilinishicha, korxonada 600 nafardan ziyod ishchi-xodim mehnat faoliyatini olib borgan. Mazkur korxona qariyb 5 oydan buyon faoliyat ko‘rsatmasdan kelmoqda. Shu vaqtga qadar ishchi-xodimlarga oylik maosh to‘lab kelingan. Ayrimlari esa haq to‘lanmaydigan ta’tilga chiqarilgan.
Hozirgi vaqtga kelib, korxona tomonidan o‘zaro kelishuv asosida, ya’ni kelgusida korxona ish faoliyatini tiklagach, qayta ishga olish sharti bilan xodimlar bilan tuzilgan mehnat shartnomalari bekor qilinmoqda. Ayni damda 150 dan ortiq ishchi-xodim ishdan bo‘shatilgan, ularning barchasiga kompensatsiya pullari to‘lab berilgan. Ishdan bo‘shatishlar, haq to‘lanmaydigan mehnat ta’tillari yana davom etishi mumkin.
“Ayni paytda Ohangaron shahar va tuman hokimligi vaqtincha ishsiz qolgan fuqarolarni ish bilan ta’minlash bo‘yicha dastlabki rejalarni muhokama qilib, takliflar tayyorlamoqda. Bunda, asosan, sanoat va ishlab chiqarishda ma’lum tajribaga ega bo‘lgan ishchilarni o‘z sohasiga yaqin bo‘lgan ishlab chiqarish obyektlariga ishga joylashtirish nazarda tutilmoqda”, — deyiladi xabarda.
Qayd etilishicha, Ohangaron tumani hokimining birinchi o‘rinbosari Mirshohid Miryunusov, hududlarni ijtimoiy-iqtisodiy rivojlantirish bo‘yicha 4-sektor rahbari Anvar Mo‘minov 27-oktabr kuni mazkur korxonada bo‘lib, ishchilar va rahbarlar bilan suhbatlashgan. Korxonadan bo‘shatilgan ishchi-xodimlarga 15 kun muddatda yangi ish o‘rinlari taklif etish bo‘yicha xulosa tayyorlanayotgani haqida axborot berilgan.
Eslatib o‘tamiz, shu yilning iyul o‘rtalarida O‘zbekistonning ikkita eng yirik shakar zavodi — “Angren shakar” va “Xorazm shakar” xomashyo yetishmovchiligi sababli ishlab chiqarishni to‘xtatib qo‘ygandi. “Gazeta.uz” mahalliy ishlab chiqaruvchilar import qiluvchilar bilan raqobat sababli qiyinchiliklarga duch kelayotganini yozgandi.
“Angren shakar” bosh direktori Rustam Akbarxo‘jayev va “Xorazm shakar” bosh direktori Umidjon Komilovning qo‘shma bayonotida esa yangi xomashyo partiyasi kelgunga qadar uskunalarni profilaktik tozalash ishlari olib borilayotganini ta’kidlagandi.
Izoh (0)