Самарқанд шаҳридаги коронавирус билан касалланишда гумон қилинган ҳамда тасдиқланган беморларни тақсимлаш маркази бош шифокори Абдулла Абиев вилоятда вирус тарқалишининг чўққиси ортда қолганини маълум қилди, деб хабар беради «Zarnews».
Абдулла Абиев қайд этишича, бугунги кунда даволаш ва тақсимлаш марказида COVID-19 касаллигига чалинган ва шу касалликка гумон қилинган 600 нафардан ортиқ бемор даволанмоқда. Айни пайтда марказга Самарқанд шаҳри, Пастдарғом, Самарқанд, Жомбой, Пайариқ ва Оқдарё туманларидан бошқа ҳудудларга нисбатдан кўпроқ бемор келмоқда.
Марказ бош шифокори кейинги 4-5 кунда беморлар сони камаяётгани, жумладан, оғир беморлар сони ҳам олдингига нисбатан анча камлигини таъкидлаган.
«Беморлар келиши ва умумий статистикага асосланиб айтиш мумкинки, Самарқанд вирус тарқалишининг чўққисидан ўтди. Аммо дунё тажрибасидан кўриниб турибдики, хасталик вақти-вақти билан авж олиши ҳолатлари ҳам кузатилмоқда. Шунинг учун вирус келиб чиқиши билан боғлиқ санитария қоидаларига эътиборсиз бўлишга ҳаққимиз йўқ», — дейди тақсимлаш маркази бош шифокори.
Аввалроқ Соғлиқни сақлаш вазирлиги ҳузуридаги Коронавирусга қарши кураш штаби аъзоси Наргиза Нуруллаева Ўзбекистонда COVID-19 билан қайта касалланиш ҳолатлари қайд этилаётганини маълум қилганди.
Мавзуга доир:
Изоҳ (0)