UzAuto Motors va Monopoliyaga qarshi kurashish qo‘mitasi o‘rtasidagi sud jarayonining navbatdagi majlisi bo‘lib o‘tdi

Toshkent shahar ma’muriy sudida 23-oktabr kuni UzAuto Motors kompaniyasi va Monopoliyaga qarshi kurashish qo‘mitasi o‘rtasida davom etayotgan sud jarayonining navbatdagi majlisi bo‘lib o‘tdi. Bu haqda Oliy sud matbuot xizmati xabar berdi.

Ma‘lum qilinishicha, sud jarayoni o‘z ishini yopiq sud majlisida davom ettirib, unda UzAuto Motors aksiyadorlik jamiyati tomonidan ishlab chiqariladigan mahsulotlarning tannarxi shakllantirilishi metodikasi, chetdan olib kelingan butlovchi ehtiyot qismlarining narxi oshishi, xorijiy valyuta kursi oshishining tannarxlarni shakllantirilishida ta’siri muhokama qilindi.

“Ushbu holatlar tekshiruvchilar tomonidan inobatga olinmaganligi hamda ehtiyot qismlarining tannarxi oshishi to‘liq o‘rganilmasdan, faqatgina tanlov asosida o‘rganilganligi, jamiyat tomonidan ish haqi va reklama xarajatlari tekshirish davomida to‘liq inobatga olinish holatlari taraflar o‘rtasida muhokama qilindi”, — deyiladi Oliy sud matbuot xizmati xabarida.

Monopoliyaga qarshi kurashish qo‘mitasi vakillari tomonidan mazkur holatlarga tushuntirish berilib, haqiqatan ham tekshirish davomida bir necha marotaba hujjatlar taqdim etish so‘ralganida jamiyat tomonidan tegishli hujjatlar o‘z vaqtida taqdim etilmaganligi, tekshirish muddati yakunlanishiga kam vaqt qolganligi sababli umumiy hisob-kitoblar tanlov asosida o‘rganib chiqilganligi ma’lum qilingan. Shuningdek, ushbu tekshirishda aniqlangan 942,8 milliard so‘m asossiz hisoblangan xarajatlar ishlab chiqariladigan avtomashinalar rejasiga qarab hisoblanganligi, agarda ushbu ishlab chiqariladigan avtomashinalar soni kamayganida yoki ko‘payganida, ushbu hisoblangan asossiz xarajatlar miqdori ham o‘zgarishi mumkinligi bildirib o‘tildi.

UzAuto Motors aksiyadorlik jamiyati vakillari narx shakllanishida kiritilgan tayyor mahsulotlarni tashish bilan bog‘liq xarajatlar qo‘mita tomonidan inobatga olinmaganligini bildirib o‘tdi.

Shundan so‘ng, tekshirishda aniqlangan, jamiyat tomonidan tovarlarni ichki bozorda dilerlar orqali sotishda teng bo‘lmagan sharoitlarda taqsimlashdagi qonun buzilish holatlari yuzasidan taraflar o‘z fikr mulohazalarini bildirdi.

Taraflardan boshqa iltimosnoma va qo‘shimcha hujjatlar mavjud emasligi, barcha vajlar muhokama qilinganligi sababli prokuror tomonidan ish hujjatlarini o‘rganish va sud muzokarasiga tayyorgarlik ko‘rish uchun iltimosnoma keltirildi.

Navbatdagi sud majlisi 2020-yil 30-oktabr kuni soat 11:00 da o‘tkaziladi.

Eslatib o‘tamiz, UzAuto Motors va Monopoliyaga qarshi kurashish qo‘mitasi o‘rtasidagi avtomobil narxlari bilan bog‘liq sud jarayoni 2-oktabr kuni boshlangan, 9-oktabrda o‘tkazilgan sud majlisida UzAuto Motors tovarlar narxini shakllantirish maxfiy hujjatlarga asoslanganini bildirgan va sud 16-oktabrdagi majlisda ishni yopiq tartibda ko‘rishni boshlagan.