UzAuto Motors ва Монополияга қарши курашиш қўмитаси ўртасидаги суд жараёнининг навбатдаги мажлиси бўлиб ўтди

Тошкент шаҳар маъмурий судида 23 октябрь куни UzAuto Motors компанияси ва Монополияга қарши курашиш қўмитаси ўртасида давом этаётган суд жараёнининг навбатдаги мажлиси бўлиб ўтди. Бу ҳақда Олий суд матбуот хизмати хабар берди.

Маълум қилинишича, суд жараёни ўз ишини ёпиқ суд мажлисида давом эттириб, унда UzAuto Motors акциядорлик жамияти томонидан ишлаб чиқариладиган маҳсулотларнинг таннархи шакллантирилиши методикаси, четдан олиб келинган бутловчи эҳтиёт қисмларининг нархи ошиши, хорижий валюта курси ошишининг таннархларни шакллантирилишида таъсири муҳокама қилинди.

«Ушбу ҳолатлар текширувчилар томонидан инобатга олинмаганлиги ҳамда эҳтиёт қисмларининг таннархи ошиши тўлиқ ўрганилмасдан, фақатгина танлов асосида ўрганилганлиги, жамият томонидан иш ҳақи ва реклама харажатлари текшириш давомида тўлиқ инобатга олиниш ҳолатлари тарафлар ўртасида муҳокама қилинди», — дейилади Олий суд матбуот хизмати хабарида.

Монополияга қарши курашиш қўмитаси вакиллари томонидан мазкур ҳолатларга тушунтириш берилиб, ҳақиқатан ҳам текшириш давомида бир неча маротаба ҳужжатлар тақдим этиш сўралганида жамият томонидан тегишли ҳужжатлар ўз вақтида тақдим этилмаганлиги, текшириш муддати якунланишига кам вақт қолганлиги сабабли умумий ҳисоб-китоблар танлов асосида ўрганиб чиқилганлиги маълум қилинган. Шунингдек, ушбу текширишда аниқланган 942,8 миллиард сўм асоссиз ҳисобланган харажатлар ишлаб чиқариладиган автомашиналар режасига қараб ҳисобланганлиги, агарда ушбу ишлаб чиқариладиган автомашиналар сони камайганида ёки кўпайганида, ушбу ҳисобланган асоссиз харажатлар миқдори ҳам ўзгариши мумкинлиги билдириб ўтилди.

UzAuto Motors акциядорлик жамияти вакиллари нарх шаклланишида киритилган тайёр маҳсулотларни ташиш билан боғлиқ харажатлар қўмита томонидан инобатга олинмаганлигини билдириб ўтди.

Шундан сўнг, текширишда аниқланган, жамият томонидан товарларни ички бозорда дилерлар орқали сотишда тенг бўлмаган шароитларда тақсимлашдаги қонун бузилиш ҳолатлари юзасидан тарафлар ўз фикр мулоҳазаларини билдирди.

Тарафлардан бошқа илтимоснома ва қўшимча ҳужжатлар мавжуд эмаслиги, барча важлар муҳокама қилинганлиги сабабли прокурор томонидан иш ҳужжатларини ўрганиш ва суд музокарасига тайёргарлик кўриш учун илтимоснома келтирилди.

Навбатдаги суд мажлиси 2020 йил 30 октябрь куни соат 11:00 да ўтказилади.

Эслатиб ўтамиз, UzAuto Motors ва Монополияга қарши курашиш қўмитаси ўртасидаги автомобиль нархлари билан боғлиқ суд жараёни 2 октябрь куни бошланган, 9 октябрда ўтказилган суд мажлисида UzAuto Motors товарлар нархини шакллантириш махфий ҳужжатларга асосланганини билдирган ва суд 16 октябрдаги мажлисда ишни ёпиқ тартибда кўришни бошлаган.