Yaqinda bankrot bo‘lgan Hindistonning Jet Airways kompaniyasi kreditorlari konsorsiumning tiklanish rejasini hal qilish imkoniyatini topdi. Bu aviatashuvchi 1,2 milliard dollar bilan bankrotligini e’lon qilganida qariyb olti oy o‘tib sodir bo‘ldi. Bankrot bo‘lguniga qadar kompaniya Hindiston havo bozorida ikkinchi o‘rinni egallab kelgan.
Kreditorlarga qarzni undirishga imkon beradigan rejani Dubaydagi magnat Murari Lal Jalan va nemis tadbirkori Florian Frich tomonidan asos solingan Londondagi Kalrock Capital investitsiya fondi taqdim etdi.
Spot nashri Forbes India tomonidan tadbirkorga oid qisqa ma’lumotlar e’lon qilingan maqolaning muhim jihatlari bilan bo‘lishdi. To‘liq matn bilan quyidagi havola orqali tanishish mumkin.
Ranchidan Dubay orqali Toshkentga
Nashr jurnalistlari Murari Lal Jalan haqida ma’lumot qidirish asnosida O‘zbekistondagi bir nechta yirik loyihalar bilan shug‘ullanib kelayotgan MJ Developers saytiga murojaat qilgan. Bundan tashqari, kompaniyaning BAAda bir nechta loyihasi mavjud.“Aftidan, biznesining asosiy qismi joylashgan O‘zbekiston va BAAdagi muvaffaqiyatlariga qaramay, Jalan nisbatan mashhur yoki u qadar taniqli emas”, — deb yozadi Forbes India.
“Bu yerdagi ish doirasi juda kichik va hamma bir-birini taniydi. Biroq u haqda hech eshitmagan ekanman”, — deydi Dubaydagi Martin Consulting aviatsiya konsalting kompaniyasi asoschisi va Eastern SkyJets Dubai loyihasi sobiq direktori Mark Martin.
“Murari Lal Jalan bizning jamiyatdan. Biz uning oilasini yaxshi bilamiz. Ular badavlat kishilar”, — deydi o‘zining anonimligi saqlanishini so‘ragan ranchilik biznesmen.
Murari Lal qachondir otasining izidan borib, qog‘oz savdosi bilan shug‘ullangan, shundan so‘ng fotoqurilmalar distributerligi va fotolaboratoriyalar ochishga o‘tgan.
1990-yillar boshida tezda parchalanayotgan Sobiq Ittifoqqa kirishga tavakkal qilgan ko‘plab hindistonlik tadbirkorlar kabi Murari Lal butun Rossiya bo‘ylab fotolaboratoriyalar tarmog‘ini ochish uchun Sankt-Peterburgga yo‘l olgan.
Taxminan o‘sha vaqtda mamlakatdagi ishonchli hamkor qidirish bilan shug‘ullangan Yaponiyaning Konica konglomerati unga o‘zining barcha turdagi fotomahsulotlarini Rossiya va MDH davlatlariga tarqatishni topshirgan.
Keyingi yillar davomida Murari Lal Jalan Kalkuttadagi Kanoi Paper and Industries kompaniyasini sotib olib, uning nomini Agio Paper&Industries’ga o‘zgartirgan, Orion Techcity egalik qiladigan 155 akrli maxsus iqtisodiy zonaga ega Orion IT Private limited muassisiga aylangan.
“Mazkur zonaga 2008-yili poydevor toshini qo‘yish marosimida Hindistonning sobiq prezidenti Pranab Mukerji ham ishtirok etgan”, — deb yozadi Forbes India.
Agio Image guruhi Sony, Konica Minolta va Panasonic’ning fotografik va iste’mol tovarlarni tarqatish hamda sotish bilan shug‘ullanadi. Bundan tashqari, guruh tarkibidan savdo va qurilish texnikalari bo‘yicha biznes ham o‘rin olgan.
Gupta oilasi bilan aloqadorligi ehtimoli
Biroq o‘tgan yili Jalanning jiyani JARdagi katta shov-shuvlarga sabab bo‘lgan Gupta oilasi a’zosiga turmushga chiqqanidan so‘ng oila mashmashalar epimarkazida qoldi, deb yozadi Forbes India.Ajay, Atula va Rajesh ismli aka-ukalardan iborat Gupta oilasi uran, oltin va ko‘mir qazib olish, mehmondo‘stlik, muhandislik ishlari, axborot texnologiyalari va OAV bilan shug‘ullangan mamlakatdagi eng badavlat oilalardan biri edi. Biroq ular 2016-yili korrupsiyada ayblangach mamlakatdan qochib ketishga majbur bo‘lgan.
“Jalanning akasi va uning oilasining oilaviy munosabatlari Jalanning tijoriy faoliyatiga hech qanday aloqasi yo‘q”, — deydi Jalanga yaqin bo‘lgan insonlardan biri.
“Konsorsium faqatgina ikki a’zodan iborati — Jalan va Frich. Barcha investitsiya ulardan keladi. Jalan Gupta oilasining hech bir a’zosi bilan ish yuzasidan bog‘lanmagan”, — deydi Kalrock Capital boshqaruvi a’zosi Manoj Madnani.
O‘zbekistondagi loyihalar
Hozirda kompaniya to‘rtta loyiha bilan shug‘ullanmoqda.Minerva City — jahon talablariga javob beradigan maktab, kollej va universitetga ega Toshkentdagi majmua. 100 gektar hududga 15 mingta xonadon, bolalar bog‘chasi, sayr qilish uchun yashil zonalar, bog‘lar, bolalar maydonchasi, klinika, mehmonxona, yoqilg‘i quyish shoxobchasi, shoping-markazlar, klabxausni joylashtirish imkonini beradi:
Lake City — Toshkentdagi “Baxt” ko‘li bazasida qurilayotgan majmua. Loyiha doirasida plyajga ega sun’iy ko‘l quriladi. Ko‘lning o‘rtasiga xuddi Las-Vegas va Dubaydagi kabi fontan qurish rejalashtirilmoqda. Ko‘l atrofidan esa kafe va restoranlar o‘rin oladi. Shuningdek, bir nechta sun’iy ko‘llar ham bunyod etiladi:
Bukhara Hotel — shahardagi birinchi besh yulduzli mehmonxona. 7 ta qavat, 228 ta xona va 2,75 gektar maydon. Bu yerdan basseyn, spa-salon, fitnes zal, bar, restoran, karaoke va banket zali o‘rin oladi:
Namangan Square — 18 gektar hududdan ofislarga ega biznes-markazlar, retoranlar, do‘konlar, sport klublari va turar joy binolari o‘rin oladi. 325 ming kvadrat metrdan ortiq maydonda qurilish ishlari amalga oshiriladi, uning ichida 1500 mingdan ortiq kvartira, 32 168 kvadrat metr joyda golf maydonchasi o‘rin oladi. Shuningdek, u yerda Iconic Towers (18 qavatli tijoriy maskanga ega egizak binolar) va Boulevard Plaza — do‘konlar, kafe, restoranlar va tungi bozorga ega bulvar joylashadi:
Izoh (0)