Endi O‘zbekiston bo‘ylab bosma nashrlar obunachilarga skuter va velosipedlarda yetkaziladi. Bu haqda AOKA huzurida bo‘lib o‘tgan brifingda “O‘zbekiston pochtasi” AJ “Matbuot tarqatish” filiali direktori Ozodbek Hojiyev ma’lum qildi.
“‘O‘zbekiston pochtasi’ AJ veb-saytida onlayn obuna bo‘lish imkoni yaratilgan. Payme to‘lov tizimi orqali masofadan turib to‘lovni amalga oshirish ham mumkin.
Hozirgi kunda yetkazib berishni tezlashtirish maqsadida markazlashgan holda obunachining manziliga yetkazib berishni takomillashtirish bo‘yicha turli transport vositalari, xususan, elektroskuterlar hamda velosipedlardan foydalanish rejalashtirilgan”, – deydi Ozodbek Hojiyev.
Uning qayd etishicha, bu tarzda yetkazib berish Farg‘ona, Andijon va Namangan viloyatlarida sinovdan o‘tkazilmoqda. Qayd etilishicha, 2021-yildan boshlab butun respublika bo‘ylab shunday tartibda yetkaziladi.
Shuningdek, Ozodbek Hojiyev davriy nashrlarni o‘z vaqtida yetkazib berish hamda uni kechikishining oldini olish maqsadida respublikada yagona bo‘lgan ishonch telefonlari yaratilganini ma’lum qildi.
“Respublikaning istalgan hududidan davriy nashrlarni olmagan obunachi holat bo‘yicha bevosita Toshkent shahridagi ishonch telefonimizga telefon qilsa, ushbu ish nazoratga olinadi”, – deydi Ozodbek Hojiyev.
Mavzuga doir:
- Amerikalik ayol O‘zbekistondan yuborilgan “posilka”dagi sovg‘a o‘g‘irlanganini aytdi. “O‘zbekiston pochtasi” bunga munosabat bildirdi
- O‘zbekistonga kelgan xalqaro jo‘natmalarni pochta orqali manziliga yetkazish tizimini joriy etish rejalashtirilmoqda
- Farg‘onada patrul-post xizmati xodimlariga skuterlar topshirildi
Izoh (0)