Bosh vazir o‘rinbosari, Turizmni rivojlantirish davlat qo‘mitasi raisi Aziz Abduhakimov Toshkent shahridagi veloyo‘lakchalar hamda aholining ommaviy sport turlari bilan shug‘ullanishi yo‘lida amalga oshirilayotgan ishlarni yaqindan ko‘zdan kechirdi. Bu haqda qo‘mita matbuot xizmati xabar berdi.
Aziz Abduhakimov boshchiligidagi ishchi guruh 22-oktabrda kun davomida poytaxtning Mirzo Ulug‘bek, Mirobod va Sergeli tumanlari bo‘ylab o‘rganish ishlarini olib borgan.
Ta’kidlanishicha, ishchi guruh vakillari mahalliy aholi hamda sayyohlarning veloyo‘lakchalardan foydalanish va xavfsiz harakatlanishi uchun yaratilayotgan sharoitlar bilan tanishib chiqqan. Joylarda bu yo‘nalishda mavjud kamchiliklar o‘rganilib, ularni tezkor bartaraf etishga oid chora-tadbirlarni amalga oshirishga kelishib olingan.
Aziz Abduhakimovning ma’lum qilishicha, Shahrisabz ko‘chasidagi veloyo‘lakcha yaqin 10 kun ichida ekspluatatsiyaga topshiriladi. Bu yo‘lakchalarda ko‘zi ojiz kishilar xavfsiz harakatlanishi uchun alohida joy ajratilgan. “Bu yo‘llarni o‘zimiz shaxsan harakatlanib, sinab ko‘rmasak, ommaviy sport hamda sog‘lom turmush tarzini targ‘ib qilishga doir ishlar jadal ketmaydi”, — deydi bosh vazir o‘rinbosari.
Toshkent shahar hokimining birinchi o‘rinbosari Davron Hidoyatov poytaxtda veloyo‘lakchalarni bunyod etishga oid ishlar haqida so‘z yuritib, Ahmad Donish ko‘chasi to‘liq tayyor bo‘lgani, Farg‘ona yo‘li ko‘chasi bitta tomonining o‘zida 7 kilometr bo‘lgan veloyo‘lakcha yaratilayotganini ma’lum qilgan.
Qayd etilishicha, asosiy kamchiliklar ayrim joylarda zinapoyalar qurilishi va bo‘yoq ishlari oxiriga yetkazilmaganligi bilan bog‘liq, lekin eng asosiy muammo avtomobillar egalarining o‘z mashinalarini tegishli belgilari bo‘lishiga qaramasdan, veloyo‘lakchalarga joylab qo‘yishida. Shu o‘rinda bosh vazir o‘rinbosari poytaxt aholisiga murojaat qilgan: “Poytaxtimizdagi barcha avtomobil egalaridan tegishli tartibga to‘liq rioya etishlarini, o‘z mashinalarini piyodalar yoki velosipedchilar harakatlanuvchi yo‘laklarda qoldirmasliklarini so‘raymiz!”.
Bundan tashqari, Aziz Abduhakimov mutasaddilarga joylarda avtoturargohlar va veloyo‘lakchalarni ko‘paytirish, obodonchilik ishlarini kengaytirish, sog‘lom turmush tarzini targ‘ib qiluvchi ma’lumotlarni ko‘paytirish, maxsus ilovalar ishlab chiqishga doir tegishli tavsiya va topshiriqlarni bergan.
Izoh (0)