Monopoliyaga qarshi kurashish qo‘mitasi UzAuto Motors’ni davlat organiga nisbatan axloqiy me’yorlardan chiqmagan holda mulohaza yuritishga chaqirdi

16-oktabr kuni Toshkent shahar ma’muriy sudida UzAuto Motors AJning Monopoliyaga qarshi kurashish qo‘mitasi maxsus komissiyasining 2020-yil 19-avgustdagi qarorini haqiqiy emas deb topish to‘g‘risidagi shikoyat arizasini ko‘rib chiqish bo‘yicha o‘tkazilayotgan sud jarayoni davom ettirilgani to‘g‘risida xabar berilgandi. Monopoliyaga qarshi kurashish qo‘mitasi UzAuto Motors’ni davlat organiga nisbatan axloqiy me’yorlardan chiqmagan holda mulohaza yuritishga chaqirdi.

Ta’kidlanishicha, Monopoliyaga qarshi kurashish qo‘mitasi shu vaqtga qadar sud jarayoni tafsilotlariga hech qanday izoh bermay kelgan, chunki UzAuto Motors AJ tomonidan keltirilgan har qanday da’vo va shikoyatlariga qo‘mitaning ekspertlari tomonidan bevosita ish ko‘rilish jarayonida javob berib kelinmoqda.

Biroq UzAuto Motors vakillari hali yopilmagan sud ishi tafsilotlariga o‘zlarining rasmiy munosabatlarini bildirib, hissiyotga berilgan holda ochiqchasiga davlat organi xodimlarini noprofessional va malakasizlikda ayblamoqda. Jumladan: “...tekshiruvga jalb etgan ekspertlarning salohiyatsizligi mijozlar bazamizning bir qismining ko‘ngli sovishiga olib kelganligidan afsusdamiz...”

Sud yig‘ilishining 3-kuni ham bundan mustasno bo‘lmadi. Xususan, AJ tomonidan quyidagilar e’lon qilindi: “Tinglovlar javobgarning argumentlari zaif ekanligini tasdiqladi va bu kutilgan holat edi...”.

Monopoliyaga qarshi kurashish qo‘mitasi ushbu masala bo‘yicha quyidagilarni ma’lum qiladi:

UzAuto Motors AJning iltimosnomasiga ko‘ra, navbatdagi sud ishi yopiq ko‘rilgani uchun qo‘mita qonunni buzmagan holda, jarayon davomida tomonlar o‘rtasida bo‘lib o‘tgan barcha tortishuv va qarama-qarshiliklar tafsilotlarini oshkor eta olmaydi. Ammo qo‘mita UzAuto Motors AJ tomonidan, maxsus komissiya qaroriga nisbatan qarshi keltirilgan dalillar yetarli darajada asoslanmaganligini ishonch bilan e’lon qiladi! Shu bilan birga, sudda “ayblanuvchining dalillari zaifligi” tasdiqlanmagan. Eslatib o‘tamiz, sud jarayoni keyingi haftaning juma kuniga qoldirildi.

Yuqoridagilardan kelib chiqib, Monopoliyaga qarshi kurashish qo‘mitasi UzAuto Motors AJni davlat organiga nisbatan axloqiy me’yorlardan chiqmagan holda mulohaza yuritishga chorlaydi.

Monopoliyaga qarshi kurashish qo‘mitasi

Eslatib o‘tamiz, deputat Rasul Kusherbayevning tanqidlari ortidan Monopoliyaga qarshi kurashish qo‘mitasi UzAuto Motors AJga nisbatan ish qo‘zg‘atgan edi. Qo‘mita kompaniya tomonidan “Raqobat to‘g‘risida”gi qonunni buzish alomatlarini aniqlagan.

Qo‘mitaning 2020-yil 19-avgust kuni o‘tkazilgan yig‘ilishida maxsus komissiya tomonidan o‘tkazilgan tekshiruvlar kompaniya avtomobil narxlarini asossiz oshirganini tasdiqlagan. Unga ko‘ra, avtomobillar narxi 3 million so‘mdan 19 million so‘mgacha asossiz oshirilgani aniqlangan.

Mazkur o‘rganish natijalari omma uchun e’lon qilingach UzAuto Motors Monopoliyaga qarshi kurashish qo‘mitasi qoshidagi maxsus komissiya qabul qilgan qaror ustidan sudga shikoyat qilishini bildirgandi va keyinroq kompaniya Toshkent shahar ma’muriy sudiga shikoyat qilgani ma’lum bo‘lgandi.