La Liga prezidenti: “Messi — pul ishlab chiqaradigan mashina”

La Liga prezidenti Xavyer Tebas “Barselona” hujumchisi Lionel Messi transfer oynasi vaqtida boshqa klubga o‘tib ketmaganidan xursandligini aytdi.

Messi Ispaniyada o‘ynayotganidan xursandman. U pul ishlab chiqaradigan mashina.

Biz yillar davomida Messi va Ronalduning ketishiga tayyorgarlik ko‘rdik, bu La Ligaga moliyaviy tomondan zarba bo‘lmasligiga intildik. Neymar PSJga o‘tib ketdi, biroq Fransiya chempionati xalqaro miqyosda o‘sishga erishmadi. Ronaldu “Yuventus”ga yo‘l oldi, A Seriya ham o‘smadi.

Messi ketgan taqdirda ham, biz keyingi to‘rt mavsumdagi La Liga translyatsiya huquqini sota olardik. Hech kim agar Messi ketadigan bo‘lsa, shartnomani bekor qilishini aytib qo‘ng‘iroq qilmadi.

Futbolchilar muhim, ammo hayot davom etadi. Ronaldu va Neymar ketdi, La Liga esa o‘sishda davom etmoqda. Sabab biz La Liga brendi rivoji uchun qilgan ishlarda. Butun ligani o‘zgartirib yuboradigan futbolchi yo‘q.

Xavyer Tebas, La Liga prezidenti

Avgust oyi oxirida Messi “Barselona”dan ketishini ma’lum qildi va “Manchester Siti”ga o‘tishga yaqin edi. Biroq katalon klubi hujumchini tekinga qo‘yib yuborishni istamadi va uni xarid qilmoqchi bo‘lganlardan 700 million yevro miqdoridagi tovon pulini so‘radi. La Liga esa “Barselona”ning pozitsiyasini oshkora qo‘llab-quvvatladi va Messining klub bilan shartnomasiga ko‘ra tovon puli 700 million yevro ekanini ma’lum qildi. Keyinchalik Messi klub bilan sudlashish niyati yo‘qligi va “Barselona”da qolishini ma’lum qildi. Uning katalonlar bilan shartnomasi 2021-yilning iyunida o‘z yakuniga yetadi.