Ла Лига президенти: «Месси — пул ишлаб чиқарадиган машина»

Ла Лига президенти Хавьер Тебас «Барселона» ҳужумчиси Лионель Месси трансфер ойнаси вақтида бошқа клубга ўтиб кетмаганидан хурсандлигини айтди.

Месси Испанияда ўйнаётганидан хурсандман. У пул ишлаб чиқарадиган машина.

Биз йиллар давомида Месси ва Роналдунинг кетишига тайёргарлик кўрдик, бу Ла Лигага молиявий томондан зарба бўлмаслигига интилдик. Неймар ПСЖга ўтиб кетди, бироқ Франция чемпионати халқаро миқёсда ўсишга эришмади. Роналду «Ювентус»га йўл олди, А Серия ҳам ўсмади.

Месси кетган тақдирда ҳам, биз кейинги тўрт мавсумдаги Ла Лига трансляция ҳуқуқини сота олардик. Ҳеч ким агар Месси кетадиган бўлса, шартномани бекор қилишини айтиб қўнғироқ қилмади.

Футболчилар муҳим, аммо ҳаёт давом этади. Роналду ва Неймар кетди, Ла Лига эса ўсишда давом этмоқда. Сабаб биз Ла Лига бренди ривожи учун қилган ишларда. Бутун лигани ўзгартириб юборадиган футболчи йўқ.

Хавьер Тебас, Ла Лига президенти

Август ойи охирида Месси «Барселона»дан кетишини маълум қилди ва «Манчестер Сити»га ўтишга яқин эди. Бироқ каталон клуби ҳужумчини текинга қўйиб юборишни истамади ва уни харид қилмоқчи бўлганлардан 700 миллион евро миқдоридаги товон пулини сўради. Ла Лига эса «Барселона»нинг позициясини ошкора қўллаб-қувватлади ва Мессининг клуб билан шартномасига кўра товон пули 700 миллион евро эканини маълум қилди. Кейинчалик Месси клуб билан судлашиш нияти йўқлиги ва «Барселона»да қолишини маълум қилди. Унинг каталонлар билан шартномаси 2021 йилнинг июнида ўз якунига етади.