Қирғизистонда разведка ходимлари Хавфсизлик кенгаши котибини бинодан ҳайдаб чиқарди

Қирғизистон Миллий хавфсизлик давлат қўмитаси биносида 9 октябрь куни эрталаб Хавфсизлик кенгаши котиби вазифасини вақтинчалик бажарувчи Омурбек Суваналиев ва мамлакат куч тузилмалари координатори иштирокида йиғилиш бўлиб ўтди. Учрашув натижасига кўра, Миллий хавфсизлик давлат қўмитаси ходимлари ва фахрийлари Хавфсизлик кенгаши котибини бинодан «ҳайдаб чиқаришга» қарор қилди, деб ёзмоқда «РБК».

Йиғилишда Миллий хавфсизлик давлат қўмитаси раҳбарияти, фахрийлари ва ходимларининг мамлакатдаги вазият юзасидан мурожаати ўқиб эшиттирилган. Унда Миллий хавфсизлик давлат қўмитаси ходимлари «айрим сиёсий ва бошқа кучларнинг манфаатларига хизмат қилмаслиги ва муайян гуруҳларнинг ғаразли мақсадларига эришиш учун сиёсий восита бўлмаслиги» айтилган.

«Шундан келиб чиқиб, бугун Миллий хавфсизлик давлат қўмитасининг раҳбарияти, фахрийлари ва шахсий таркиби Қирғизистон Республикаси Хавфсизлик кенгаши котиби вазифасини бажарувчи, кучишлатар ва ҳуқуқни муҳофаза қилувчи органлар координатори, генерал майор Омурбек Суваналиевни Миллий хавфсизлик давлат қўмитасининг марказий биносидан ҳайдаб чиқарди», — дея матбуот хизматининг сўзларини келтирмоқда «РБК».

Орадан кўп ўтмай президент Сўронбай Жээнбековнинг Миллий хавфсизлик давлат қўмитаси раҳбари Ўрозбек Опумбаевни истеъфога чиқариш тўғрисидаги фармони эълон қилинган.

Худди шундай ҳолат мамлакат Ички ишлар вазирлигида ҳам юз берган. Унинг биносидан вазирлик раҳбари вазифасини бажарувчи Курсан Асанов чиқариб ташланган. Вазирлик матбуот хизмати ИИВ мутасаддилари шунга ўхшаш баёнотни қабул қилганликларини маълум қилган.

«Мамлакатда кескин сиёсий вазият вужудга келган ушбу октябрь кунларида куч тузилмалари ва ҳуқуқ-тартибот идоралари сиёсатдан ташқарида қолиши ва муайян гуруҳларнинг ғаразли мақсадларига эришиш воситаси бўлмаслиги керак. Ички ишлар вазирлиги шахсий таркиби ва ИИБ фахрийлари бирлашди, чунки мақсад битта — мамлакатда тинчлик ва барқарорликни ўрнатиш. Шу сабабли Курсан Асанов ИИВ биносини тарк этди», — дейилади матбуот хизмати хабарида. Шу билан бирга, вазирлик сайтида ИИВ биносида  Хавфсизлик кенгаши котиби Омурбек Суваналиев раислигида йиғилиш ўтказилганлиги тўғрисида хабар эълон қилинган.

Ҳозирда Қирғизистонда бир нечта бошқарув марказлари пайдо бўлган. 4 октябрда бўлиб ўтган парламент сайловлари натижасида юзага келган норозилик намойишларидан сўнг мухолифатнинг иккита мувофиқлаштирувчи кенгаши пайдо бўлди. Улардан бири амалдаги парламентнинг тарқатилишини эълон қилди. Сайлов натижаларининг ўзи ҳақиқий эмас деб топилган. Президент бош вазир ва мамлакат ҳукуматини истеъфога чиқарди, аммо улар ўз вазифаларини бажаришда давом этмоқда. Парламент 6 октябрь куни собиқ депутат Садир Жапаровни бош вазир этиб тайинлади, аммо бу қарор ҳали президент томонидан тасдиқланмаган.