Kanadaning Condor Petroleum neft-gaz kompaniyasi 2021—2024-yillarda O‘zbekistonning Buxoro viloyatidagi gaz konlarini o‘zlashtirishga 1 milliard dollardan ortiq investitsiya kiritishni rejalashtirmoqda.
“Dunyo” axborot agentligining xabar berishicha, bu haqda O‘zbekistonning AQSh va Kanadadagi elchisi Javlon Vaxobov va Condor Petroleum rahbarlari — direktorlar kengashi raisi Dennis Balderston va prezident Don Streum ishtirokidagi uchrashuvda aytilgan.
Dennis Balderston O‘zbekistonning neft-gaz sohasida salohiyati juda yuqori ekanligini, tabiiy gaz ishlab chiqarishni ko‘paytirish uchun katta imkoniyatlar mavjudligini ta’kidlagan.
Loyiha Gazli shahri hududida mavjud bo‘lgan beshta konni modernizatsiya va ekspluatatsiya qilish, ishlab chiqarishni ikki baravar ko‘paytirishni ko‘zda tutadi.
Bundan tashqari, kompaniya O‘zbekistonda mahalliy kadrlar tayyorlash uchun Kanadaning turli xil ixtisosliklar bo‘yicha kasb-hunar maktablarini tashkil etish, shuningdek mablag‘larni ijtimoiy loyihalarga sarflash niyatida.
1994-yilda tashkil etilgan Condor Petroleum Markaziy Osiyo, Shimoliy va Janubiy Amerika, Indoneziya, Liviya, Angola, Turkiyada faoliyat yuritgan. Kompaniya Markaziy Osiyo mintaqasida eng katta va texnik jihatdan eng ilg‘or 3D seysmik ma’lumotlarni yig‘ish va qayta ishlash dasturiga ega. Dastur neft qazib olish uchun 79 ta istiqbolli obyektlarni aniqlash imkonini bergan.
Izoh (0)