Fuqarolarni Koreyada ishlashga jo‘natishni va’da qilgan agentlikdan jabr ko‘rganlarning pullarini qaytarish boshlandi

Profelite IMP xususiy bandlik agentligi Koreyada ishlash niyatidagi yuzlab o‘zbekistonliklarni aldagani haqida xabar berilgan edi. Xabarda aldangan fuqarolarning ayrimlari o‘zini o‘ldirish va oilasidan ajrashish darajasiga yetgani, agentlik rahbariga nisbatan jinoiy ish ochilgani va u qidiruvga berilgani ta’kidlangandi.

Ko‘pchilikni ushbu jamiyatdan jabr ko‘rgan fuqarolarning pul mablag‘lari nima bo‘ladi, degan savol qiziqtirgan va bu bo‘yicha “Kun.uz” nashri Majburiy ijro byurosi bilan bog‘langan.

MIB matbuot xizmatining ma’lum qilishicha, Jinoyat ishlari bo‘yicha Sergeli tuman sudining jabrlanuvchilarga zarar pullarini qaytarilishi yuzasidan ijro hujjatlari Majburiy ijro byurosiga shu yil 28-sentabr kuni kelib tushgan.

“Hozir Majburiy ijro byurosi tomonidan tashkil etilgan hududlardagi ishchi guruhlarga 37 nafar jabr ko‘rgan fuqarolar hisob-raqamlari to‘g‘risidagi arizalar bilan murojaat qilib, ularga zarar pullari proporsional tartibda o‘tkazilishi ta’minlandi.

Moddiy zararni qaytarish masalasida murojaat etmagan 226 nafar fuqarolarga hududlarda tashkil etilgan ishchi guruhlarga murojaat qilishlari va yetkazilgan zarar pullari qisqa muddatda ularning hisob raqamlariga proporsional ravishda o‘tkazilishini eslatib o‘tamiz”, – deyiladi MIB taqdim etgan ma’lumotda.

Tergov va sud davrida aniqlangan jami zarar miqdori 9 milliard so‘mga yaqin. Ishni ko‘rib chiqqan sudya G‘.Amonovning ma’lum qilishicha 422 million so‘m pul va 60 million so‘mlik bir dona avtotransport vositasi undiruvni ta’minlash uchun xatlangan.

Bandlik va mehnat munosabatlari vaziri o‘rinbosari Bahodir Umrzoqovning so‘zlariga ko‘ra, fuqarolarga yetkazilgan zarar to‘liq qoplanadi. Zararning qo‘shimcha qismi Mehnat migrantlarini qo‘llab-quvvatlash jamg‘armasi orqali to‘lab beriladi.

Jabrlanuvchilar quyidagi manzil bo‘yicha murojaat qilishlari so‘ralmoqda:

Avvalroq Korean and migrations xususiy bandlik agentligi mansabdorlariga tayinlangan sud hukmiga qisman o‘zgartirish kiritilgani xabar qilingandi.