Samarqand viloyatida tovuq go‘shtidan tayyorlangan kabob iste’mol qilgan 15 kishi zaharlangani haqida xabar berilgandi. Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi xizmati mazkur holat bo‘yicha ma’lumot berdi.
Sanitariya-epidemiologik osoyishtalik xizmati tomonidan o‘tkazilgan epidemiologik tekshiruv natijasida aniqlanishicha, 2020-yilning 4-oktabr kuni soat 20:00 da Samarqand shahar Ziyokorlar ko‘chasi 16-xonadonda shu hovlida boqilgan tovuq go‘shtidan sixli kabob tayyorlangan. Kabobni oilaning 10 nafar a’zosi va shu xonadonda qurilish olib borayotgan 5 nafar ishchi iste’mol qilgan.
Oradan 3 soat o‘tib, kabob iste’mol qilganlarda bosh og‘rig‘i, ko‘ngil aynish, qayd qilish, hansirash, havo yetishmasligi kabi klinik belgilar qayd etilgan. Ular o‘zlarini yomon his qilgach tez tibbiy yordamga qo‘ng‘iroq qilgan.
Shundan so‘ng Respublika shoshilinch tez yordam ilmiy markazining Samarqand viloyati filialiga murojaat qilgan 15 nafar fuqaroga “metgemoglobin hosil qiluvchi birikmalardan zaharlanish” tashxisi qo‘yilgan va tibbiy yordam ko‘rsatilgan. Epidemiologik surishtiruvlar va zarur profilaktik tadbirlar o‘tkazilgan.
Kasallik qayd etilgan xonadonda o‘tkazilgan tekshiruv davomida iste’mol qilingan mahsulotlardan laboratoriya tahliliga namunalar olingan. Natijada ovqatga ishlatilgan tuz xonadon egasi tomonidan olib kelinib, alohida sellofan idishda saqlangan natriy nitrat moddasi ekanligi tasdiqlangan.
“O‘tkazilgan davo muolajalaridan so‘ng klinik belgilar yo‘qolgan, bemorlarning ahvoli yaxshilangan va uylariga javob berilgan”, — deyiladi xabarda.
Avvalroq Andijonda tug‘ilgan kun tortidan 8 kishi, Qashqadaryoda ovqatdan 65 nafar ishchi zaharlangani xabar qilingandi.
Izoh (0)