Канаданинг Condor Petroleum нефть-газ компанияси 2021—2024 йилларда Ўзбекистоннинг Бухоро вилоятидаги газ конларини ўзлаштиришга 1 миллиард доллардан ортиқ инвестиция киритишни режалаштирмоқда.
«Дунё» ахборот агентлигининг хабар беришича, бу ҳақда Ўзбекистоннинг АҚШ ва Канададаги элчиси Жавлон Вахобов ва Condor Petroleum раҳбарлари — директорлар кенгаши раиси Деннис Бальдерстон ва президент Дон Стреум иштирокидаги учрашувда айтилган.
Деннис Бальдерстон Ўзбекистоннинг нефть-газ соҳасида салоҳияти жуда юқори эканлигини, табиий газ ишлаб чиқаришни кўпайтириш учун катта имкониятлар мавжудлигини таъкидлаган.
Лойиҳа Газли шаҳри ҳудудида мавжуд бўлган бешта конни модернизация ва эксплуатация қилиш, ишлаб чиқаришни икки баравар кўпайтиришни кўзда тутади.
Бундан ташқари, компания Ўзбекистонда маҳаллий кадрлар тайёрлаш учун Канаданинг турли хил ихтисосликлар бўйича касб-ҳунар мактабларини ташкил этиш, шунингдек маблағларни ижтимоий лойиҳаларга сарфлаш ниятида.
1994 йилда ташкил этилган Condor Petroleum Марказий Осиё, Шимолий ва Жанубий Америка, Индонезия, Ливия, Ангола, Туркияда фаолият юритган. Компания Марказий Осиё минтақасида энг катта ва техник жиҳатдан энг илғор 3D сейсмик маълумотларни йиғиш ва қайта ишлаш дастурига эга. Дастур нефть қазиб олиш учун 79 та истиқболли объектларни аниқлаш имконини берган.
Изоҳ (0)