Samarqandda 9 oy ichida 2,5 milliard so‘mga yaqin mablag‘ noqonuniy sarflangani aytildi

Samarqand viloyatida “Inqirozga qarshi kurashish jamg‘armasi” mablag‘lari hisobidan 2 milliard 303 million 986 ming so‘m noqonuniy xarajatlar amalga oshirilgan. Bu haqda Korrupsiyaga qarshi kurashish agentligi direktori Akmal Burhonov agentlikda tashkil etilgan matbuot anjumanida ma’lum qildi.

Dastlabki ma’lumotlarga ko‘ra, Samarqandda 2020-yilning o‘tgan 9 oyida 2 milliard 450 million 60 ming so‘mlik moliyaviy xato hamda kamchiliklar aniqlangan. Ulardan 2 milliard 303 million 986 ming so‘mi noqonuniy xarajatlar hisoblanadi.

Moliya vazirligi “Inqirozga qarshi kurash jamg‘armasi tomonidan Samarqand viloyatida shakllantirilgan “Tez tibbiy yordam” brigadalari xodimlarini bir martalik moddiy rag‘batlantirish uchun moliyalashtib bergan 486 million so‘mlik mablag‘i noto‘g‘ri to‘langan. Masalan, genekolog, COVID-19 infeksiyasi bilan kasallangan bemorlarni davolashga umuman aloqasi yo‘qlarga 25 million so‘mdan pul bergan. Yoki bo‘lmasa, 60 million so‘mlik narsani 300 million so‘mga sotish holatlarini olaylik. Bu murojaat hali, albatta, o‘rganiladi. Bu holat afsuski, faqat Samarqandda emas, hamma viloyatda ushbu sohalarda bor.

Akmal Burhonov, Korrupsiyaga qarshi kurashish agentligi direktori

O‘zbekiston Prezidenti farmoni bilan Moliya vazirligi huzurida tashkil etilgan, 10 trillion so‘m budjetga ega “Inqirozga qarshi kurashish jamg‘armasi” mablag‘larining maqsadli sarflanishi Korrupsiyaga qarshi kurashish agentligi tomonidan o‘rganib kelinmoqda. Unga ko‘ra, agentlik tomonidan Bosh prokuratura, Hisob palatasi, Moliya vazirligi, Iqtisodiyot va kambag‘allikni qisqartirish vazirliklaridan ma’lumotlar olinadi. Aniqlangan huquqbuzarliklar mazkur tashkilotlarga yetkaziladi. Akmal Burhonov hozirgacha ushbu yo‘nalishda 50 dan ortiq qonun buzilish holatlari aniqlanganini ta’kidlagan. Bular, asosan, Sanitariya-epidemiologiya xizmati, sog‘liqni saqlash tizimida ko‘proq kuzatilmoqda. Shularni inobatga olib agentlik vazirlik va idoralar bilan birgalikda jamg‘arma mablag‘larini sarflanishi bo‘yicha eng ko‘p murojaat kelib tushayotgan hududlardan biri Samarqand viloyatida ishchi guruh boshchiligida o‘rganish o‘tkazgan. Ma’lum qilinishicha, ushbu muammo Samarqand viloyati misolida ko‘rilib, keyinchalik uning kompleks tizimli ildizlari o‘rganiladi.Eslatib o‘tamiz, Inqirozga qarshi jamg‘armasi Prezident koronavirus pandemiyasi va global inqirozli hodisalarning iqtisodiyot tarmoqlariga salbiy ta’sirini yumshatish bo‘yicha birinchi navbatdagi chora-tadbirlar doirasida 2020-yilning mart oyida tuzilgan. May oyida jamg‘arma mablag‘larining 3,306 milliard so‘mi ishlatilgan bo‘lib, ularning aksariyati (1,4 trillion so‘m) iqtisodiyotni qo‘llab-quvvatlashga yo‘naltirilgandi.