Namangan viloyati hokimi Shavkatjon Abdurazzaqov MIB xodimlari harakatiga norozilik sifatida o‘ziga o‘t qo‘yib, vafot etgan ayol xonadonini yo‘qladi. Bu haqda “Daryo” muxbiri Azizbek Abduvaliyev xabar bermoqda.
Shavkatjon Abdurazzaqov Namangan shahridagi “Istiqbol” mahallasida bo‘lib, marhuma Gulandom Dadaboyevaning yaqinlariga ta’ziya bildirdi. Uning 15 va 12 yashar o‘g‘illari munosib sharoitlarda voyaga yetishlarida har tomonlama ko‘mak berilishini ta’kidladi.
— Mazkur holat bo‘yicha hozirda prokuratura idoralari tomonidan tergov harakatlari olib borilmoqda. Ularning natijasi bo‘yicha vaziyatga qonuniy, huquqiy baho beriladi va bu haqda, albatta, jamoatchilikka ma’lum qilinadi, — dedi viloyat hokimi.
Eslatib o‘tamiz, 2020-yil 29-sentabr kuni Namangan shahrida istiqomat qilgan 35 yoshli Gulandom Dadaboyeva ijro harakatlari davomida o‘zining ustiga benzin quyib, yoqib yuborgandi.
Ayol 30-sentabr kuni tanasining 80 foizdan ortiq kuyish tan jarohati oqibatida Respublika shoshilinch tez yordam ilmiy markazi Namangan filialida vafot etgan.
Ushbu holat yuzasidan Namangan shahar prokuraturasi tomonidan Jinoyat kodeksining 103-moddasi 1-qismi (o‘zini o‘zi o‘ldirish darajasiga yetkazish) bilan jinoyat ishi qo‘zg‘atilgan.
O‘zini yoqib yuborgan ayolning onasiga ijro harakatlarini bajarishini so‘rab 30 dan ortiq marta murojaat qilingani, uning o‘ziga 13 ming dollarni undirib berishni esa hozircha imkoni bo‘lmagani ma’lum qilingandi.
Mavzuga doir:
- Namanganda MIB xodimlariga norozilik bildirib, o‘ziga o‘t qo‘ygan ayol vafot etdi
- Namanganda MIB xodimlariga norozilik bildirib, o‘zini yoqib yuborib halok bo‘lgan ayol voqeasi yuzasidan jinoyat ishi qo‘zg‘atildi
- MIB Namanganda o‘zini yoqib yuborgan ayolning 13 ming dollar pulining nima sababdan undirilmaganiga izoh berdi
- MIB: Namanganda o‘zini yoqib yuborgan ayolning onasiga ijro harakatlarini bajarishini so‘rab 30 dan ortiq marta murojaat qilingan
Izoh (0)