Самарқандда 9 ой ичида 2,5 миллиард сўмга яқин маблағ ноқонуний сарфлангани айтилди

Самарқанд вилоятида «Инқирозга қарши курашиш жамғармаси» маблағлари ҳисобидан 2 миллиард 303 миллион 986 минг сўм ноқонуний харажатлар амалга оширилган. Бу ҳақда Коррупцияга қарши курашиш агентлиги директори Акмал Бурҳонов агентликда ташкил этилган матбуот анжуманида маълум қилди.

Дастлабки маълумотларга кўра, Самарқандда 2020 йилнинг ўтган 9 ойида 2 миллиард 450 миллион 60 минг сўмлик молиявий хато ҳамда камчиликлар аниқланган. Улардан 2 миллиард 303 миллион 986 минг сўми ноқонуний харажатлар ҳисобланади.

Молия вазирлиги «Инқирозга қарши кураш жамғармаси томонидан Самарқанд вилоятида шакллантирилган «Тез тиббий ёрдам» бригадалари ходимларини бир марталик моддий рағбатлантириш учун молиялаштиб берган 486 миллион сўмлик маблағи нотўғри тўланган. Масалан, генеколог, COVID-19 инфекцияси билан касалланган беморларни даволашга умуман алоқаси йўқларга 25 миллион сўмдан пул берган. Ёки бўлмаса, 60 миллион сўмлик нарсани 300 миллион сўмга сотиш ҳолатларини олайлик. Бу мурожаат ҳали, албатта, ўрганилади. Бу ҳолат афсуски, фақат Самарқандда эмас, ҳамма вилоятда ушбу соҳаларда бор.

Акмал Бурҳонов, Коррупцияга қарши курашиш агентлиги директори

Ўзбекистон Президенти фармони билан Молия вазирлиги ҳузурида ташкил этилган, 10 триллион сўм бюджетга эга «Инқирозга қарши курашиш жамғармаси» маблағларининг мақсадли сарфланиши Коррупцияга қарши курашиш агентлиги томонидан ўрганиб келинмоқда. Унга кўра, агентлик томонидан Бош прокуратура, Ҳисоб палатаси, Молия вазирлиги, Иқтисодиёт ва камбағалликни қисқартириш вазирликларидан маълумотлар олинади. Аниқланган ҳуқуқбузарликлар мазкур ташкилотларга етказилади. Акмал Бурҳонов ҳозиргача ушбу йўналишда 50 дан ортиқ қонун бузилиш ҳолатлари аниқланганини таъкидлаган. Булар, асосан, Санитария-эпидемиология хизмати, соғлиқни сақлаш тизимида кўпроқ кузатилмоқда. Шуларни инобатга олиб агентлик вазирлик ва идоралар билан биргаликда жамғарма маблағларини сарфланиши бўйича энг кўп мурожаат келиб тушаётган ҳудудлардан бири Самарқанд вилоятида ишчи гуруҳ бошчилигида ўрганиш ўтказган. Маълум қилинишича, ушбу муаммо Самарқанд вилояти мисолида кўрилиб, кейинчалик унинг комплекс тизимли илдизлари ўрганилади.Эслатиб ўтамиз, Инқирозга қарши жамғармаси Президент коронавирус пандемияси ва глобал инқирозли ҳодисаларнинг иқтисодиёт тармоқларига салбий таъсирини юмшатиш бўйича биринчи навбатдаги чора-тадбирлар доирасида 2020 йилнинг март ойида тузилган. Май ойида жамғарма маблағларининг 3,306 миллиард сўми ишлатилган бўлиб, уларнинг аксарияти (1,4 триллион сўм) иқтисодиётни қўллаб-қувватлашга йўналтирилганди.