Toshkent shahridagi Davlat test markazi binosiga bir qancha abituriyentlar 5-oktabr kuni to‘plandi. Ular O‘zbekiston Prezidentining 2012-yil 31-maydagi 1765-sonli farmonida nazarda tutilganidek, test sinovlari natijalarini hisoblashda abituriyentlarga harbiy xizmat yakunlari bo‘yicha berilgan tavsiyalar inobatga olinmaganidan norozilik bildirgan. Bu haqda “O‘zbekiston 24” telekanalining “Fakt 24” dasturida ma’lum qilindi.
Ushbu vaziyatda katta ehtimol bilan harbiy xizmat guvohnomasidagi raqamlarning noto‘g‘riligi, ya’ni guvohnoma raqami 0 (nol) bilan boshlanganligi muammo tug‘dirgan.
Huquqshunos Xushnudbek Xudoyberdiyev Telegram kanalida yozishicha, bunda abituriyentlar onlayn ro‘yxatdan o‘tishda tavsiyanomalarini bazaga kiritgan. Ammo DTM bazasi shunday qilinganki, agar pasport, diplom yoki tavsiyanoma raqami nol bilan boshlansa, o‘sha boshidagi nol tushib qoladi. Imtiyozi hisoblanmagan barcha abituriyentlarniki nol bilan boshlanadi.
Taxminan, DTM vazirliklarga tasdiqlash uchun ro‘yxat yuborganda o‘sha nolsiz yuborgan. Vazirliklar esa bunaqa raqamli tavsiyanoma berilmagan, deb qaytargan.
Abituriyent Behzod Ahmadjonovning so‘zlariga ko‘ra, u xizmat qilgan harbiy qismning raqamini (0395) MTM ma’lumotlar bazasiga kiritishda dastlabki nol tushib qoldirilgan, shu sababli unga berilgan tavsiyanoma hisobga olinmagan.DTM rasmiylari bu vaziyatga markazning aloqasi yo‘qligini aytmoqda.
“Ro‘yxatdan o‘tgan hamma abituriyentlarni tasdiqlash uchun tegishli vazirlik idoralariga berganmiz. Vazirliklarda kimning imtiyozi bo‘lsa, o‘sha abituriyentga imtiyoz qo‘llanilgan. Agar abituriyentga imtiyoz berilgani haqida ma’lumot kelmagan bo‘lsa, ularga imtiyoz qo‘llanilmagan.
Imtiyozi yo‘q deb belgilangan abituriyentga imtiyoz qo‘llashga DTMning haqqi yo‘q. Bu yerga kelib test markazining vakolati yo‘q narsani so‘rayapsizlar”, – deydi DTM boshqarma boshlig‘i Barno Rajabov.
Rasmiyning ta’kidlashicha, bu masala qachon hal bo‘lishi aniq emas. U abituriyentlarga esa faqat kutishni maslahat bergan.
Avvalroq O‘zbekiston OTMlariga kirish imtihonlarida 189 ball to‘plab, kontraktga kirgan abituriyentlarning natijalari qayta hisoblanib, ular budjetga kirgani haqida xabar berilgandi.
Izoh (0)