Toshkent viloyati prokuraturasi tomonidan Parkent tumani hokimligi tomonidan Captiva rusumli avtomashinani sotib olishda qonun buzilishi holatlari aniqlandi. Bu haqda Korrupsiyaga qarshi kurash agentligi rahbari Akmal Burhonov agentlikda tashkil etilgan matbuot anjumanida ma’lum qildi.
Qayd etilishicha, 14-sentabr kuni davlat xaridlari veb-saytida Parkent tumani hokimligi zaxira fondi mablag‘laridan foydalangan holda 2018-yilgi Captiva-2 avtomobilini 260 million so‘mga sotib olganligi to‘g‘risida ma’lumot paydo bo‘ldi. Avtomobil Mega Karer MJChdan sotib olingani ma’lum qilindi.
MChJ ta’sischilari qatorida tuman hokimi Nig‘mat Isroilovich Muhamedovning o‘g‘li Sardor Nig‘matovich Isroilov (34%) ham qayd etilgan.
Toshkent viloyati hokimligi matbuot kotibi Behzod Qobulov avtomobil xaridini izohlar ekan, Parkent tumani tog‘lar va tog‘ etaklaridan iborat bo‘lganligi sababli 2019-yilda tuman ma’muriyati Captiva rusumli avtomashina sotib olishni rejalashtirgani, biroq o‘sha vaqtda tuman budjetida yetarli mablag‘ bo‘lmagani tufayli, tuman hokimining farzandi, ya’ni Mega Karer MChJ ta’sischilaridan biri otasi foydalanishi uchun mazkur mashinani berib turganini ma’lum qilgan.
Korrupsiyaga qarshi kurashish agentligi vaziyatni o‘rganib chiqib, tergovga qadar tekshirish uchun Bosh prokuraturaga so‘rov yuborgandi. Ushbu fakt bo‘yicha prokuratura Parkent tumani hokimining harakatlarini tergovga qadar tekshiruvdan o‘tkazdi.
Tekshiruv davomida “Davlat xaridlari to‘g‘risida”gi qonun buzilishi, xususan, avtomobil sotib olishda manfaatlar to‘qnashuvi aniqlandi. Natijada, tuman hokimining avtomobil sotib olish to‘g‘risidagi buyrug‘i bekor qilindi va Mega Karer MChJ 260 million so‘mni hokimiyat hisob raqamiga qaytarib berdi.
Toshkent viloyati prokuraturasi tergovga qadar tekshirishni davom ettirmoqda.
Izoh (0)