Prezident Shavkat Mirziyoyev 2-oktabr kuni “Sog‘liqni saqlash sohasida davlat boshqaruvi tizimini yanada takomillashtirish chora-tadbirlari to‘g‘risida”gi qarorni imzoladi, deb xabar bermoqda “Gazeta.uz” Adliya vazirligi matbuot xizmatiga tayanib.
Qarorga ko‘ra:
Sog‘liqni saqlash vaziri o‘rinbosari — Toshkent shahar sog‘liqni saqlash bosh boshqarmasi boshlig‘i lavozimi joriy etildi. Ayni paytda ushbu lavozim avgust oyi boshidan Botirbek Isabekov lavozimdan ozod etilganidan buyon vakant bo‘lib qolmoqda.
Sog‘liqni saqlash vaziri o‘rinbosari — Respublika shoshilinch tibbiy yordam ilmiy markazi bosh direktori lavozimi tugatildi. 2017-yil aprelidan buyon ushbu qo‘shma lavozimni 16-iyuldan beri sog‘liqni saqlash vazirining birinchi o‘rinbosari bo‘lgan, ammo hali ham RShTYIMga rahbarlik qilib kelayotgan Abduhakim Hojiboyev egallagan.
Bundan tashqari, Qoraqalpog‘iston sog‘liqni saqlash vaziri va viloyatlar sog‘liqni saqlash boshqarmalari boshliqlari sog‘liqni saqlash vaziri tomonidan tegishlicha Qoraqalpog‘iston Respublikasi Jo‘qorg‘i Kengesi raisi va viloyat hokimlari bilan kelishilgan holda hududiy tibbiyot muassasalari rahbarlari esa sog‘liqni saqlash vaziri hamda Qoraqalpog‘iston Jo‘qorg‘i Kengesi raisi va viloyat hokimlari bilan kelishilgan holda viloyat sog‘liqni saqlash boshqarmasi boshliqlari tomonidan lavozimga tayinlanadi.
2020-yil 1-noyabrdan Sog‘liqni saqlash vazirligi va hududiy boshqaruv organlari xodimlariga quyidagi miqdorda ko‘p yil ishlaganlik uchun har oylik ustama to‘lanadi (rag‘batlantirish koeffitsiyentini inobatga olgan holda lavozim maoshiga nisbatan koeffitsiyentlarda):
- 1 yildan 3 yilgacha – 0,3;
- 3 yildan 5 yilgacha – 0,6;
- 5 yildan 10 yilgacha – 0,8;
- 10 yildan 15 yilgacha – 1;
- 15 yildan 20 yilgacha – 1,2;
- 20 yildan yuqori – 1,5.
Izoh (0)