Yoshlar ishlari agentligining Qashqadaryo viloyat boshqarmasi “Daryo” internet-nashrida 28-sentabr kuni e’lon qilingan “Qashqadaryodagi ayrim tumanlarda Yoshlar ishlari bo‘limlariga agentlik tavsiya qilgan nomzodlar emas, boshqalar tayinlandi. Chunki agentlikning xati ‘yuridik kuchga ega emas’” sarlavhali maqolaga munosabat bildirdi.
Maqolada Yoshlar ishlari agentligining Dehqonobod, Chiroqchi va G‘uzor tumanlaridagi bo‘limlari rahbarligiga agentlik tomonidan boshqa mutaxassislar tavsiya qilingan bo‘lsa-da, agentlikning viloyat boshqarmasi ko‘rsatib o‘tilgan hududlardagi quyi tashkilotlarga butunlay boshqa shaxslarni boshliq qilib tayinlagani haqida so‘z boradi.
Yoshlar ishlari agentligi tuman bo‘limlari boshliqligiga nomzodlarni tavsiya qilishdan avval avgust oyida Qashqadaryodagi 15 ta shahar va tuman hokimlari ko‘rsatgan uch nafardan nomzod – jami 45 kishi bilan suhbat o‘tkazgan. Agentlik aynan shu suhbatdan o‘tganlar bilan 19-avgustdan boshlab uch oy sinov muddatiga shartnoma tuzishni tavsiya qilgan.Biroq Qashqadaryo viloyati boshqarmasi agentlik tavsiyasiga zid o‘laroq, nomzodlar bilan qayta suhbat o‘tkazib, ayrim hududlardagi quyi tashkilotlarga boshqalarni boshliq qilib tayinlagan. Boshqarmaning 29-sentabrdagi munosabatida ta’kidlanishicha, bunga ayrim nomzodlarning “ish haqidan qoniqmagani, sohada tajribasi yetarli emasligi” sabab qilib ko‘rsatib o‘tilgan.
“Dehqonobod tumani bo‘limi boshlig‘i lavozimiga tavsiya etilgan nomzod Adham Qulmamatov bilan suhbat o‘tkazilganda, u tizimda mavjud muammolarni yaxshi bilmasligi, rahbar sifatida ish tashkil etish bo‘yicha aniq rejasi yo‘qligi ma’lum bo‘ldi. Shu tufayli biz sohada tajribasi bor, ilgari tuman Yoshlar Ittifoqi raisi bo‘lib ishlagan Oybek Nurmurodovni munosib deb bildik”, -- deydi agentlikning Qashqadaryo viloyat boshqarmasi boshlig‘i Shohjahon Omonov.
Viloyat boshqarmasining kadrlar bilan ishlash bo‘yicha mutaxassisi so‘zlariga ko‘ra, Chiroqchi tuman bo‘limi boshlig‘i lavozimiga tavsiya etilgan Alisher Beknazarov bilan 12-sentabr kuni bog‘lanilgan (vaholanki, Yoshlar ishlari agentligi tavsiya etilgan nomzodlar bilan 19-avgustdan boshlab shartnoma tuzishni so‘ragan), ammo Beknazarov “maktabda ishlashi, ishi ko‘pligi va ishlash niyati yo‘qligi”ni aytgan. Shu bois uning o‘rniga 16-sentabrda Jamshid Xursandov tayinlangan.
G‘uzor tumani bo‘limi boshlig‘i lavozimiga tavsiya qilingan Nodir Saidov esa, viloyat boshqarmasi munosabatida ta’kidlanishicha, “ish haqi uni qoniqtirmagani” bois ishni rad etgan. Hozirda uning o‘rniga boshqa tuman hokimligi tavsiya qilgan boshqa nomzodlar ko‘rib chiqilmoqda. Munosabatda alohida ta’kidlanishicha, Normurodov va Xursandovning tayinlovi esa Yoshlar ishlari agentligi bilan kelishilgan holda amalga oshirilgan.
Yoshlar ishlari agentligi tomonidan tashkilotning Chiroqchi tuman bo‘limi boshlig‘i lavozimiga tavsiya etilgan, biroq yakunda bu lavozimga tasdiqlanmagan Alisher Beknazarovning “Daryo”ga ma’lum qilishicha, viloyat boshqarmasining munosabatiga yolg‘on aralashgan, boshqarma mas’ullari uydirma to‘qimoqda.
“Biz tashkilot ishini telefonda hal qilib qo‘yadigan ko‘cha bolasi emasmiz-ku. Agentlik tavsiyasi bilan uning tumandagi mas’ul xodimi deb topilganimizdan so‘ng, telefonda bir og‘iz ‘yo‘q, ishlamayman’ desak -- bu gapni-ku aytmaganman, aytgan bo‘lganimda ham -- shu yetarli bo‘ladimi? Unda ‘nega nomzodingizni qo‘ygandingiz, suhbatda qatnashishdan maqsad nima edi?’, degan savol tug‘ilmaydimi? Buni hokimlik orqali hal etishlari kerakmasmidi?”, -- deydi u.
“Daryo”da e’lon qilingan avvalgi maqolada Yoshlar ishlari agentligining kadrlar masalasi bo‘yicha mas’uli Shomurod Sattorov tashkilotning hududiy boshqarmalarga chiqarilgan tavsiya xati “yuridik kuchga ega emas”ligini ta’kidlab, o‘zining shaxsiy fikricha, “agentlikning tuman va shahar bo‘limlariga Yoshlar ittifoqining hududiy rahbar kadrlari qo‘yilishi to‘g‘ri deb o‘ylashi”ni aytib o‘tgan edi.
Yoshlar ishlari agentligi mas’ullari o‘tkazgan suhbatlardan “tajribasiz, muammolardan bexabar, ish rejasi yo‘q, ish haqidan bexabar” mutaxassislar o‘tib ketganiga, viloyat tashkiloti rasmiy ishlarni oddiy telefon suhbati orqali (shunda ham yuqori turuvchi tashkilotning xatidan salkam bir oy o‘tib) hal qilayotganiga agentlik va uning rahbari Alisher Sa’dullayev qanday munosabat bildiradi? Tashkilotning oddiy tayinlov ishlarida shuncha tartibsizlik va tushunmovchilik, yoshlarning katta ishlari, katta muammolari qanday hal qilinadi?
Izoh (0)