Toshkent shahridagi jinoiy sheriklariga narkotik modda yetkazib berish maqsadida yo‘lga chiqqan samarqandlik fuqaro qo‘lga olinib, unga nisbatan jinoyat ishi qo‘zg‘atilgan, deya xabar berdi “Daryo” muxbiri.
Ma’lum bo‘lishicha, 2020-yilning 29-sentabr kuni DXX Samarqand viloyati boshqarmasi, viloyat IIB hamda Bojxona boshqarmasi xodimlari hamkorligida “reyd” o‘tkazilgan. “Reyd”da Bulung‘ur tumani hududidagi “Yuqori nuqta” YPX maskanida Cobalt mashinasi to‘xtatilib, xolislar ishtirokida ko‘zdan kechirilgan.
Tekshiruv davomida haydovchi, 1974-yilda Ishtixon tumanida tug‘ilgan S.A.ning yonidan 23 gr “opiy” giyohvandlik moddasi, avtomashinadan 200 dollar va 4 million 200 ming so‘m miqdoridagi pullar borligi aniqlanib, protsessual tartibda rasmiylashtirilib olingan.
Aniqlanishicha, S.A. giyohvand moddasini Toshkent shahrida yashovchi jinoiy sheriklariga yetkazib berishni rejalashtirgan.
Ushbu holat bo‘yicha boshqarma Tergov bo‘limi tomonidan Jinoyat kodeksining 246-moddasi (Kontrabanda) va 273-moddasi (Giyovandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) bilan jinoyat ishi qo‘zg‘atilgan. Tergov harakatlari olib borilmoqda.
Izoh (0)