Tadbirkor va bloger Aziza Umarova o‘zining Telegram’dagi sahifasida “Sardoba xarobalarida” nomli post qoldirib, unda Sirdaryo viloyati, Mirzaobod tumani, “Haqiqat” mahallasida ilgari molxona, omborxona bo‘lgan joy endi bir oila uchun boshpanaga aylanganini yozdi.
Uning aytishicha, oila 44 yoshli idish yuvuvchi bo‘lib ishlaydigan ayol G.A., uning “sanitarka” bo‘lib ishlaydigan, turmushi o‘xshamagan 25 yoshli qizi va uning 5 yoshli o‘g‘li hamda 16 yoshli yana bir qizidan iborat. Bu oila suv toshqinidan jabrlanganlar sifatida hech qanday moddiy yordam olmagan. Uyining kadastri bo‘lmagani uchun davlat ularga uy bermagan, o‘rniga besh qavatli yangi uydan kreditga xonadon sotib olishni taklif qilishgan.
Aziza Umarova Sardobada jabr ko‘rgan odamlarning muammolariga e’tibor qaratishni so‘rab, ushbu oila va unga o‘xshaganlarga uy berishni iltimos qilgan.
Bunga munosabat bildirgan Sirdaryo viloyati hokimligi matbuot xizmatining ma’lum qilishicha, Sardobadagi toshqindan so‘ng ushbu oila Sardoba suv omboridagi texnogen holat sabab yuz bergan suv toshqiniga qadar G.A. nabirasi va ikki nafar qizi bilan ukasining uyida birga yashab kelgan. Uy esa ukasining rafiqasi nomida bo‘lib, yetkazilgan zararini qoplash maqsadida hozirda yangi qurilayotgan uy-joylardan biri berilishi nazarda tutilgan va hujjatlari qabul qilingan. Shuningdek, unga hukumat tomonidan 40 million so‘mlik kompensatsiya puli, maishiy texnika uchun sertifikat berilgan.
G.A. va uning farzandlari ham e’tibordan chetda qolmagan. Boquvchisi yo‘qligi, buning ustiga, ikki nafar qizi va nabirasi bilan yashayotganligi inobatga olinib, unga ham 40 million so‘m pul, maishiy texnika uchun sertifikat ajratilgan.
Toshqindan so‘ng barcha evakuatsiya qilinganlar qatorida G.A. ham oila a’zolari bilan tuman markazidagi kollej yotoqxonasiga joylashtirilib, yetarlicha oziq-ovqat va kiyim-kechak bilan ta’minlangan. Ammo u kollej yotoxonasida ma’lum muddat yashagach suv toshqiniga qadar istiqomat qilgan xonadonining ilgari molxona, omborxona o‘rnida foydalanilgan qismiga kelib joylashgan.
Kuz mavsumining yog‘ingarchiliklari hisobga olinib, tuman hokimi o‘rinbosari, mahalla va oilani qo‘llab-quvvatlash bo‘limi boshlig‘i tomonidan G.A. va uning oila a’zolari avtobus bilan tuman markazidagi kollej yotoqxonasiga yana olib kelingan. Issiq ovqat, kiyim-kechak bilan ta’minlangan bo‘lsa ham, sababsiz ravishda yashash uchun yaroqsiz bo‘lgan joyga yana qaytib ketgan.
“Ayon bo‘lishicha, G.A. bunday xatti-harakatlari bilan talafot ko‘rgan aholi uchun qurilayotgan uylardan o‘zi va oilasi uchun ham ajratilishini xohlamoqda. Biroq belgilangan tartib-qoidalar mavjud”, — deyiladi viloyat hokimligi xabarida. Ya’ni, yuqorida ta’kidlanganidek, G.A. talafotdan oldin yashagan xonadoni ukasining turmush o‘rtog‘i nomida bo‘lganligi sabab uning nomiga hujjatlar rasmiylashtirilgan.
Qayd etilishicha, shunday bo‘lishiga qaramay, fuqaroning oilaviy sharoiti hisobga olinib, ayni kunlarda G.A.ga “Haqiqat” mahallasida qurilayotgan uy-joylardan ipoteka krediti asosida xonadon ajratilishi uchun kerakli hujjatlar viloyat ishchi guruhi tomonidan qabul qilingan va o‘rganilish jarayonida.
Izoh (0)